Ka JSU-Central Body lyngba u President ka seiñ, u Jersom Shylla wa u General Secretary u Treiborlang Suchen da pyrchah joor ko ya i thmu ka sorkar MDA wow pynman ya ka MeECL kam ka Private Company deiwa thoh cha u Chairman cum Managing Director ka Meghalaya Energy Corporation Limited wow pyrchah ya ini wow khut Tender wei e Contract wow pynlai noh ya ka 3x42MW MLHEP Stage 1 Power Station wa ka 2x20MW New Umtru Power Station ka MePGCL cha ki Private Company kiwa na baar jylla.
Ka seiñ da ong ko wa ini i leh ka sorkar jylla pynyoo i em iyi iyi cha lyndet wow yoh myntoi ki kattu katni ngut ki heh ki haaiñ neibhah hapoh ka jylla leh em ki bru kiwa da pliah ha ini i kaam wow pynlai ya ki Power Station ka MeECL.
Ka seiñ da ong ko leh wa i thmu ka sorkar wow e cha ki Private Company, daw wanrah ko ya i dooh myntoi wa khroo la ha i yoh khih yoh kreh heiwa boon kiwa ye u leh ya ki kaam waphær waphær yong ka MeECL wei ya i hok ki khon khynroo khyllood daw wan knieh noh da kiwi kiwa na baar jylla.
Heiyatoh wa ini waroh, ka seiñ yieñ skem ko wow pyrchah joor ya ini i thmu ka sorkar deiwa kyrmen skem wa ka sorkar daw ap ko ya ini i pyrchah ki paidbah.
