Khliehriat: Ka Southern Border Youth Welfare Association (SBYWA), Elaka Rymbai & Lakadong, East Jaiñtia Hills District hadeiñ wa yoh ko ya i ujor na ki paidbah wa chong chnong yong ka thaaiñ, da hiar ko ynne ka sngi wow sylli ya i thaw wow chna ya kawi ka karkhana Coke Plant wa tip kam ka Unique Industry Coke Plant kawa da kam tre da u Delwir Swer uwa na Khliehriat West.
Kani ka karkhana em ko ha khap chnong Umsatai, Lad Wahwapung, Deinsatlang wa ka Pynurkba Elaka, Rymbai ha Wah Diengling.
Neiliang ka Association da yaklam ko wa u tre katai ka karkhana heiwa da khana che u wa da yohbor u na ki waheh chnong ki soo chnong chwa u chna ya kani ka kharkhana.
Neiliang ka Association da suba ko wa da e NOC sop sop kitai ki waheh chnong khlem tip ki paidbah neibhah katkam i khana kiwa chong chnong kini ki chnong da ong ki wa ym yoh ki ya ka Dorbar Chnong ka wow pynsñiaw paidbah hapoh ka chnong.
Ka Assocation da yoh ko leh wow yaklam wa kattu katni ngut ki Secretary chnong, ki rangbah wa ki paidbah ki soo chnong khamtam ya ki le chnong Umsatai, Ladwahwapung wa ka Deinsatlang kiwa pynsñiaw wa ym em ka rai yong ka Dorbar Chnong hajrong kani ka Coke Plant.
Ka Assocation da pyrchah joor ko ryngkat i sur yong ki paidbah wow pyndam u chna ya kani ka karkhana neibhah daw ktah i ya i chait i nang, daw pyntngit ko ya ka la-ær wa riñ mynsien khamtam ya ki khynnah skur heiwa da em boon tylli ki skur ha kitai ki chnong.
Ka Assocation da kyrpaad joor ko leh ya ka JHADC kawa toh u pait u yoo ya ka khyndaw ka chyiap wow pymdam chwa ya ka NOC yong kani ka karkhana wei hajrong ini daw ujor ko ha JHADC.
Kani toh katkam wa phah u Namphrangmi L Talang, u General Secretary ka SBYWA.
Discussion about this post