Jowai: Ka Seng Samla Sonapyrdi da pyrchah joor ko hajrong i thmu yong ka Star Cement wow pynheh chooh chooh ya i tih moochuni dei wow sdang u tih moochuni sa ha Brishynrot, East Jaiñtia Hills District.
Ka seiñ da ong ko wa i wan em ki Cement Plant ha ka thaaiñ Narpuh hi waroh kawi toh da i dur wow wanrah yaka roi ka paar, wow e kaam e jaam ya ki tre chnong hi waroh kawi tangwa da man ko kamwa yooh tdong pseiñ heiwa ka thaaiñ Narpuh da man pathan ko kawa da dooh kyrmen ya ki pateiñ wow wan nalor i jæd ki khloo i kjam wa i ku i chit neidaw wa ka la-ær da phær ko ym toh de kam kitu ki por wa nachwa, wei ka Seng Samla Sonapyrdi ha u snem 2007 da yoo ko yei kylla rong ka wah Lukha na i jakhlia wa mih na ki Cement Plant.
Kamtæ ka Seng Samla Sonapyrdi u pyrchah bait ko ya i thmu kani ka Company wow tih moochuni ha Brishynrot neibhah na kani ka thaw da em sa kawi ka wah wa tooid cha ka wah Lukha wei ini daw ktah biang ko sa chisien ya ka wah Lukha kamwa da jia nachwa wa kylla rong suiñ bneiñ ko.
Chooh chooh ka seiñ da ong ko wa katni ka wah Lukha da sdang man ko kam kawi na ki thaw uiñke suwari wei na ini ki tre chnong leh da sdang ki wow yoh kamai ha ki bynta waphær waphær na i wan kiwa wan ke na kylleiñ.
Kamtæ ka seiñ ka yieñ ko ha kani ka yurim wow pyrchah joor ya i thmu ka Star Cement wow tih moochuni ha Brishynrot neidaw wa chisien daw pynsih biang ko yaka wah Lukha.
Discussion about this post