Ka Synjuk ki Waheh Chnong East Jaiñtia Hills District lyngba ka kyrwoh wa da pynlait da u President, u Satly Ryngkhlem wa u Secretary, u Jesper Bareh hadien wa da yoh ya ka khubor wa da em i thmu yong ka sorkar jylla wow kyrriah kaam noh ya u Deputy Commissioner yong ka East Jaiñtia Hills District, da pynman ki ya ka yalang wa jhan wow ya pyrkhat hajrong itai i thmu yong ka sorkar. Kamtæ hajrong ini i thmu ka sorkar, ka Synjuk da pynsñiaw ko yei pyrchah hadooh kattæ wow kyrriah kaam noh ya u DC ka East Jaiñtia.
Ka Synjuk da ong ko leh wa ini i rukom kyrriah ya ki sahep sorkar chwa wow kut ka samoi krehkaam da ktah bha ko yei ye wow pyndep ya ki kaam pynroi heiwa ha kiwa boon ki por da sahteiñ wei da thut i kreh.
Chooh chooh ka Synjuk da ong ko wa da sakhi wa u E. Kharmalki kam u DC ka District da man u u bru wa kreh hok wei ym jooh pynsahteiñ ya iwon iwon i kaam hawa yatoh wa ki paidbah yong ka District wei ya kam uni u bru dang emkaam wow neh chwa hapoh ka District khamtam heiwa i por krehkaam yong oo leh katkam ka Service Rule ym pu kut i.
Hajrong ini waroh da ong wa lada ym pynsangeh noh ka sorkar yeini i thmu yong ka, neiliang ka Synjuk ym yohsa ko wow pynbna noh da ki yakhih wa khor.
