Jowai: Ki 5 tylli ki seiñbhalang napoh ri-loom Jaiñtia kiwa kynthup ya ka East Jaiñtia National Council (EJNC), All Jaintia Students Union (AJSU), West Jaiñtia National Council (WJNC), Hynñiewtrep National Youth Front (HNYF) waka Jaiñtia National Council (JNC) ha i yachem lang yong ki wa yahkhmat yong ki ha ka 5 tarik uni u bnai da ya phyllu yumut ki hajrong i thmu yong ka NHAI wow wai ya ka Toll Gate Plaza ha u sarok bah NH-44 ha Ladsaliya, Ialong, West Jaintia Hills District, wei ha ini i yachem neiliang ki 5 seiñ da iwi i yumut da rai ki wow pyrchah joor ya i thmu yong ka NHAI wow wai ya ka Toll Gate Plaza hapoh WJHD.
Ki 5 seiñ da ong ki wa da pyrchah ki toh neidaw wa ka NHAI da dep chna ko yaka Toll Gate Plaza ha chnong Lumshnong, East Jaiñtia Hills District, wei sah sa du wow pynkrehkaam ya kani ka Toll Gate.
Lada e laad yaka NHAI wow chna 2 tylli ki Toll Gate Plaza hapoh ri-loom Jaiñtia daw ktah bha ko ya kiwa lai wa wan lyngba uni u saroh bah khamtam kitu kiwa na nyngkyndong kam na Umkiang, Ratacherra,Huroi, Sonapur wa kiwi kiwi neibhah lada lai emkaam ki cha Shillong hap lai lyngba ki 2 tylli ki Toll gate, chadooh Guwahati daw hap ki u lai lyngba 4 tylli ki Toll Gate, kamtæ ini i lai lyngba 2 hadooh 4 tylli ki Toll Gate daw ktah bha ko ya i lut i sep yong ki paidbah.
Ini i em boon palat ki Toll Gate Plaza daw ktah ko leh ya ki bru kiwa na baar kiwa lai lyngba uni u sarok bah NH-44 khamtam yaki Truck kiwa kit marbaam mardih.
Kamtæ ki 5 seiñ da e por ki ya ki bor District wow chimkhia ya ini wei wow pynsangeh ya ini i thmu wow chna yaka Toll Gate wei lada ym ye u pynsangeh ki 5 seiñ da lai ki da kiwi ki luti neibynta yong u paidbah.
Discussion about this post