Jowai: Ka seiñ AJYWO Central Body, da pyrchah joor ko ya ka Citizenship (Amendment) 2016 yong ka Sorkar Pyrdi, ka Bill kawa thmu wow kynthup yei man tre ri ki bru khian paid na Bangladesh, Pakistan wa Afghistan kiwa wan chong chnong hapoh ri India.
“I pyrchah joor i ya ka Citizenship (Amendment) 2016 kawa thmu wow pynkylla thymme ya ka Citizenship Act 1955, khnang wow yohlaad ki khian paaid wow man tre ri hapoh India kam ki Hindu, Sikh, Buddhist, Jain, Parsi, wa Christian na Bangladesh, Pakistan wa Afghanistan kiwa da chong chnong be-aiñ chwa hapoh ka Ri India, hajrong ka yurim wa kani ka Bill daw ktah joor ko ya ki jaitbru khian paaid kiwa da em chwa hapoh ka ri wa ka jylla, nalor wa man ko pyrchah ya ka Article 14 yong ka Riti Synchaar, ka Ri India,” da ong u M H Dkhar, President, ka AJYWO Central Body.
Ka seiñ da ong ko leh wa man i iwa phylla wa wot tang ya ki tre ri kiwa da em chwa, ka sorkar leh ympu ye ko wow kdup bha ya ki wei wow e ya i hok yong ki, katni nawon da kwah ko wow elaad ya kiwa na baar ri wow man tre ri.
Heijooh i por ka seiñ da e yaroh ko ya ka sorkar jylla wa hapoh i yahkhmat u Conrad Sangma wow chim ka rai wow pyrchah ya kani ka Bill wa wanrah da ka sorkar pyrdi.
Chooh chooh ka seiñ da kyntu ko ya ka sorkar jylla wow pait bniah wei wow thooh yutip lada em namo ym em kam kini ki bru kiwa sah be-aiñ kam na Bangladesh, Afghanistan wa Pakistan hapoh ka jylla wei wa lada em kam kitæ wow phah liwan noh ki cha ka ri wa man tre ki neibhah wa lada em ki daw booh ko hei maa ya ki tre jylla wa ki jaitbru khian paaid.
Discussion about this post