Pyrchah ka 6-Shnong Wah Lukha Association yaka Public Hearing ka Star Cement

Jowai: Ka 6-Shnong Wah Lukha Association, Sonapyrdi, East Jaintia Hills District da pynsñiaw ko yei pyrchah yei pynman yaka Public Hearing ka Star Cement yow paan bor yow sdang tih moochuni ha ka chnong Brichyrnot haka 19-10-19.

Ka Association da ong ko wa ini i thaw wa thmu wow tih moochuni ka Star Cement wa heh 42.051 Hectare man ko ka thaw man khloo (Forest Area) kawa em leh hajan ka Narpuh Wildlife Sanctuary kamjooh hajan ka wah Lukha wei lada e laad wow tih moochuni daw wanrah ko yei pynjæd pynpra yaka rymaw, ya ki khloo ki kjam kamjooh ki mrad khloo wa ki doh um iwa daw ktah leh ya i miat kani ka thaaiñ kawa man leh kam ka thaw uiñke suwari khamtam ka wah Lukha.

Da ong leh wa da seiñ yaka Association yow pynneh pynsah yaka wah Lukha kawa hachwa wow wan ki karkhana pynmih khyndaw-bilat man ko kawa boon dakha, kawa dang hoi wow dih, kawa im ja kiwa boon na i khwe dakha, tangwa nadooh wa em kini ki karkhana da kylla rong ko cha i rong suiñ bneiñ, kawa da kylla man Acid ka um hadooh wa ym hoi de wow dih yaka wei da lang leh ki jakhlia ha ka kiwa da suba toh wa mih na kini ki karkhana. Wei dei kreh chitom ka Association da sdang ka wah wow miat u bha tangwa lada sdang u tih moochuni daw ktah biang ko ya kani ka wah kawa da chah ktah chwa.

Ka Association da ong ko leh wa kani ka thaw wa thmu wow tih moochuni em ko du kamwa 500 meter naka wah Lunar kawa tooid cha ka wah Lukha kawa daw pynyap ya waroh ar kini ki wah.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chooh chooh da ong wa i tih moochuni pathar hapoh ka Narpuh Elaka da wanrah ko yei pynhaap ya ki dieñ ki khloo, da wiar ki loom iwa da ktah chiboon ya ka rymaw wei ym e laad wa ka juk wow wan hap chitom ki neini wei u yaleh katwa ye yow yada yaka rymaw.

Kamtæ ka 6-Shnong Wah Lukha Association da pynsñiaw ko yei pyrchah wei da kyntu ko ya u Member Secretary ka Meghalaya State Pollution Control Board (MSPCB) wow pyndam ya kani ka Public Hearing wei lada lai ko cha khmat ka Association daw pynman ko yei pyrchah wa joor.

Da pyntip leh wa daw lai yachem wa u Member Secretary ka MSPCB yow pynsñiaw yei pyrchah.