Ka China da ujor ko pyrchah yei lai u Prime Minister ka ri, u Narendra Modi haka 9 tarik uni u bnai cha Arunachal Pradesh heiwa da wai u lai leh yaka Sela Tunnel.
Ka China dang kam bait ko yaka Arunachal Pradesh deiwa khut yaka kam ka South Tibet heiwa da ong wa ini i leh da ka sorkar India daw pynsih ko yeini i kaam khappood.
“Ka China ym em tipmit ko yaka Arunachal Pradesh kawa da seiñ pyrchah yaka aiñ da ka India wei i pyrchah i yeini,” da ong uwa e ktien ka China Foreign Ministry, u Wang Wenbin hawa yaklam wa kiwa thoh khubor.
U Wenbin da ong u wa ka India ym em hok ko wow wanrah ki kaam pynroi ha Zangnan, China. Zangnan toh i pyrtuid wa da e ka China yaka Arunachal Pradesh.
“Ini wa leh ka India daw kynroi i ya ini i kaam pood. Ka China pyrchah joor ko yeini wow wan da uwa yahkhmat ka ri cha khappood ka China-India,” da ong uni u heh ka China.
Ka China nachwa leh da jooh da jooh pyrchah ko yei wan kiwa yahkhmat ka India cha Arunachal Pradesh. Tangwa ka India da ong ko wa kani ka jylla man ko kam chibynta ka ri wei i khut pyrtuid ka deiwa ym pynkylla yeini.
Kam wow pynkynmoo wa ka Sela Tunnel toh ka Twin Lane Tunnel kawa jrong dooh ha pyrthai kawa em 13,000 ft na sla duriaw wei daw pynsuk yow lai cha Tawang wa em ha Arunachal Pradesh.
Yow chna ya kani ka Tunnel da booh mooyurim ha u snem 2019 wei da slem u pyndep ka neidaw wa wan ka khlam COVID-19.
Ya kani ka Tunnel da chna hei lut wa Rs. 825 klur kawa em artylli heijooh i por kawi kawa jrong 1,595 Meter wa 1,003 deilang waka sarok wa jrong 8 Km yow poi cha kani ka Tunnel.
Kani ka Tunnel toh kawa em hajan ka Line of Actual Control (LAC) hajan wa u pood waka China.
Ha kani ka sngi, u Modi da wai u leh ya ki kreh wa chongdor Rs. 55,600 neibynta ka Northeast wa kynthup yaka Manipur, Meghalaya, Nagaland, Sikkim, Tripura wa Arunachal Pradesh haka yalang wa da pynman ha Itanagar.
Discussion about this post