Pyrchah ka Congress yei kyrriah ya ka PWD North Jowai Division cha Shangpung

Jowai: Hadien wa mih i pynbna yei kyrriah ya ka chnat PWD North Jowai Division, Jowai cha Shangpung da ka sorkar neibynta wow pynsuk ya i krehkaam kani ka chnat, da mih boon i pyrchah na ki seiñbhalang heiwa da em kiwa da maham wow yaleh PIL.

Neiliang ki seiñ saiñ hima, ka West Jaiñtia Hills District Congress Committee (WJHDCC) wa u CEM warim u Awhai Andrew Shullai uwa man leh u President ka Congress WJHDCC da pynsniaw ki yei pyrchah joor hajrong i thmu kyrriah ya kani ka ophis PWD cha ka chnong Shangpung.

“I kyrriah ya kani ka ophis PWD (Rds) North Jowai Division cha Shangpung ym myntoi ya kiwon kiwon, wei kani man ko du ka kaam Politics yong ka National People’s Party (NPP) wa ki kattu katni kiwa mihkhmat paaidbah”, da pynbaad u Andrew Shullai, CEM warim yong ka JHADC uwa man leh u MDC ka Jowai Central.

Da ong u leh wa ka Sub Division kawa da em chwa haka chnong Shangpung wei da em ki ya kiwa kreh nadooh ki JE, SA wa kiwi kiwi kiwa kreh, tangwa wow pynlai yaka ‘Administration’ u neh ha ka chnat PWD North Jowai Division wei emkaam wow neh ko ha Jowai, ka Headquarter yong ka District West Jaiñtia Hills yow suk ki paidbah kiwa na kylleiñ ka District wei kamjooh yow lai chaaid chaaid ki kaam ka ophis PWD North emkaam wow em hajan ka Treasury Office kawa em ha Jowai.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

U Andrew da ong u leh wa boon hi kiwa kreh ha kani ka chnat kiwa chong wa sah ha Jowai wei lada lai cha khmat daw ktah ko ya i lut i sep kiwa kreh nadooh ki Muster Roll hadooh ki heh ka chnat wei daw pyntkoh ko ya i krehkaam kani ka chnat.

Ka West Jaiñtia Congress Committee da pynrem joor ko ya u MLA ka Jowai neidaw wa khlem yasaaid u iyi iyi wow pynneh ya kani ka ophis ha Jowai kamjooh neibynta ki bru yong ka Constituency kiwa kreh ha kani ka chnat da boon boon snem kattu, wei da pyndooh mynsien ya kiwa kreh wa kiwa chong chnong ka Constituency.

Neiliang ka Congress ka dawa ko wa ka sorkar toh u pyrkhat bha ha chwa wow chim ya kam kini ki rai wow kyrriah yaka ophis sorkar neibhah ym myntoi ko wow pynthut yei krehkaam wa i chakri yong ki chnat sorkar. Ka Congress ka da ban joor ko wa ka sorkar ym toh u pait ko du yei myntoi ka kaam Politic næ i myntoi yong uwon uwon, emkaam wow pait yaka myntoi wa salonsar u paidbah.