Ka Dorbar Chnong Umkiang da pynsñiaw ko yei pyrchah wa joor yei yang sonteri ki chipai BSF Umkiang BOP, hapoh ka chnong Umkiang, itæ ha Petrol Pump (Wahkhian), NH06 khlem da yoh bor na ka Dorbar Chnong.
Iwi na i daw toh wa ini i rukom yang miet ki BSF toh cha yung bru wa cha ki dukan iwa da pyntieñ pynsmiej yei lai i wan ki bru, kiwa dai wa thied, khamtam ya kitu ki bru wa chong wa sah ha katai ka thaw khamtam ki khynnah kynthai. Ka chnong da ong ko wa ki BSF hei yong sakhiat toh u lai yang ki cha ki thaw khappood yow pait yei psiah pyrchah aiñ kiwa na Bangladesh hadooh ki Rohingya.
Da ong leh wa kiwa psiah chapoh India da yoh ki u psiah suk neidaw wa ki BSF da yang ki ha u sarok NH06 heithaw wow em ha ki thaw wa kær pood kat u yoo da yang pathan ki hapoh ka chnong Umkiang. Wei heipor wa ki BSF da muja ki ha Umkiang, ki nong Bangladesh da psiah ki cha ki kpær ki nong India yow tooh kwai, tooh pathi, ki mrad ri kam ki mooid ki masi wa kiwi kiwi.
Neiliang kiwa yahkhmat ka chnong leh da lai ki wow yaklam wa kitai ki BSF tangwa da chah pynkhor pathan ki wei ym bien ki wow mih na ki yung ki bru yow lai cha u pood.
Ka chnong ha ka 31 tarik u Naisaphra da dep thoh ko cha u DC wa u SP ka East Jaiñtia Hills hajrong ini i chong yang pood ki BSF cha yung ki bru deiwa ong leh wa ka chnong em ko ya ka VDP yow pait yei bha i miat ka chnong najrong wa em ki pulit, wei ym toh i kaam ki BSF wow pait yei chongsuk chong chngaaiñ hapoh ka chnong ka thaw.
Kamtæ da kyrpaad ya ka sorkar kamjooh ya u DC wa u SP ka East Jaiñtia Hills wow tuklar ya ini i leh embor ki chipai BSF heipor miet, khnang wym mih iwon iwon i huri hura hapyrdi ki paidbah wa chong chnong wa ki BSF.
Heijooh i por ka Dorbar Chnong e ko yei kyrchaan ya ki chipai BSF lada leh ki yei sonteri ya u pood yow lait na kiwon kiwon ki kaam wym man yong ki nong Bangladesh kiwa da wan wow tooh yeiwa em ki nong India step wei miet.
