Ka East Jaintia National Council (EJNC) da pynsñiaw ko ya i sñiawphylla wei pyrchah joor yei pdiang ka sorkar jylla lyngba yong u M.R. Synrem Commissioner & Secretary ka chnat Commerce & Industrial ya i tyrwa yong ki kharkhana pynmih khyndaw-bilat kiwa kynthup ya ka Star Cement, Meghalaya Cement waka Dalmia Cement (Bharat) kiwa em hapoh East Jaiñtia Hills District wow wanrah ya u mooyong na Assam 30 Truck chisngi.
Kani ka rai yong ka sorkar jylla lyngba ka chnat Commerce & Industries ye ko u booh ya kiwa chong chnnong yong ka EJHD hapyrdi i maa kawa khroo nei poor yong u khñiang COVID-19.
Ka EJNC kawi na ki seiñbhalang kawa pait ya i bha i miat yong ka imlang sahlang da pyrchah joor ko yei pdiang yong ka sorkar jylla wow wan ki 30 tylli ki Truk kit mooyong chisngi na Assam cha EJHD khamtam ha kam ini i por wa ka ri India hi waroh kawi em ko hapyrdi i Lockdown neibynta wow yada ya ki paidbah na i poor uni u khñiang COVID-19.
Kam ka seiñ dap ko da i sñiawphylla wa kammon ka sorkar pdiang ko ya kitai ki Truck na Assam hawa tang i lai i wan neiwi District cha iwi i District dang man i iwa maa.
“Sa katwon hi-eh u ye i u yait na i poor uni u khñiang COVID-19 lada pdiang ya kini ki 30 Truck kiwa wan na Assam wow psiah chapoh ka District ka yong i?” da kylli ka seiñ.
“Du neibynta wow lai yaw ki karkhana pynmih khyndaw-bilat ym ye i u booh ya kiwa chong chnong yong kani ka District hapyrdi i maa iwa khroo nei poor yong u COVID-19. Lada u paidbah ye u yaichah ya kani ka Lockdown ileh kitai ki karkhana ym ye ki u yang kamwa da yang waroh ki paidbah?” da kylli biang ka seiñ.
Ka EJNC klam che ko wa lada ka sorkar ym phah sangeh ko ya kini ki truck kit mooyong ki wow wan cha EJHD, ka seiñ daw lai ko da kawi tawan ka luti, heijooh i por kyrpaad ko leh ya ki MLA/MDC ka EJHD wow pyrchah joor ki ya kani ka rai yong ka sorkar jylla neibynta i chngaaiñ yong ki paidbah ka District wei yaka jylla leh waroh kawi.
Ka kyrwoh na u Sambormi Lyngdoh, President EJNC-CEC.
Discussion about this post