Jowai: Ka East Jaintia National Council (EJNC) – Central Executive Council, da pynsñiaw ko yei pyrchah kawa joor ya i pynku dor yong ka Jaiñtia Hills Cement Manufacture Association (JHCMA) ya i khyndaw bilat ya ki tre chnong wa tre Elaka naka T. 160 chi churia cha ka T. 281 chi churia ya kiwa em hapoh ka Elaka katwa T. 204.80 ya kiwa em ha ki chnong wa em ki karkhana.
Neiliang ka EJNC da ong ko wa i leh yong ka JHCMA da pynyoo che kdar yei sdang yong i leh embor wow yooh beiñ ya ki tre chnong tre Elaka.
I daw wa e ka JHCMA wa pynkudor yaka khyndaw bilat ya ki tre chnong wa ki tre Elaka toh neidaw ka GST iwa ka seiñ ym ye ko u pdiang, deiwa ong wa yaka GST da pynkrehkaam nadooh u snem 2017 tangwa ka JHCMA da pynkudor ko du ha uni u snem 2019 iwa da pynsuba joor wa em iyi iyi cha kylla.
Ka seiñ da ong ko leh wa kam ki paidbah yong ka Elaka Narpuh ym toh u e laad ki ya kini ki karkhana wow tyngkheiñ yaka soskular wa da dep ya soi hapyrdi yong ka Elaka wa kini ki karkhana neibhah i pynku dor yaka khyndaw bilat man ko kam wa tyngkheiñ ya iwa da yasoi chwa.
Neiliang yong ka seiñ daw yahcem ko wa ki bor wa pynlai District yong ka East Jaiñtia Hills haki sngi wow wan yow yaklam halor kani ka phang wei lada ka yaklam ym man ko kawa mihsoh, neiliang yong ka EJNC daw pynbna noh ko da ki yakhih.
Katkam i pynbna ka JHCMA, i krehkaam i dor thymme toh nadooh ynnin ka chi tarik wei nachwa chi churia i khyndaw bilat chongdor i T. 160 wei kattu deiwa kheiñ yaka GST wa 28% kawa poi T. 44.80 iwa hap su da kiwa thied kamtæ ya ki chnong wa em ka karkhana u poi ko T. 204.80 chi churia.
Ya kiwi won wa em hapoh ka Elaka nachwa chi churia i khyndaw bilat da chongdor ko T. 220 wei deiwa kheiñ ka GST wa 28% iwa da poi T. 61.60 kamtæ i dor thymme da poi cha T. 281.60.
Discussion about this post