Ka Federation of Khasi Jaintia & Garo People (FKJGP) ynne ka sngi da pynsñiaw ko yei pyrchah hakhmat u Montri ka chnat Bordiñ yei thung kaam ya u MK Chettri uwa man u Engineer wa dang rap hapoh wow chimkti kam u Director ka Meghalaya Power Distribution Corporation Limited, neibhah em ki sahep Khasi kiwa da rap hachwa ya oo. Neiliang ka seiñ da pynsñiaw ko leh yei sñiawkhia hajrong i ekti ka MeECL wow pynlai ya ki Sub Station cha ki Company kiwa na baar.
Ka seiñ da kyntu ko leh ya u Montri ka chnat Bordiñ wa i pyndooh bordiñ namo ka Load Shedding ym em ktah palat ko ya ki paidbah, khamtam ki khynnah khynroo kiwa dang lai puræ wa ym toh u chah ktah ki neibhah em ki hapyrdi ki Board Exam, deiwa pynbor ya ka sorkar lada man kammon kammon leh toh u pynbiang ya i bordiñ khnang wa ki khynnah wa yaleh ya ki Exam ym chah ktah ki.
U General Secretary ka FKJGP, u Dundee C Khongsit da pyntip u wa ka seiñ da yaklam ko leh hajrong i thmu yong ka MeECL wow ekti noh u pynlai ya ki Sub Station cha kiwi, neibhah wa daw ktah ko ya ki khynroo kiwa da kreh ya katai ka kaam waroh chi kattu hapoh i pait yong ka MeECL, wei hajrong ini da khana u wa neiliang u Montri da kular u wa daw bichaar ya kitu kiwa da kreh ha kitai ki kaam wa ym chah ktah ki.
Uwa yahkhmat ka FKJGP da pyntip u leh wa neiliang ka seiñ da pynsñiaw ko leh yei sñiawkhia hajrong i wym kynthup ya ki wakreh wa thung Contract ha ka chnat MeECL katkam ka Reservation Policy, heiwa da ong u wa ki sahep wa pliah kiwa kwah wow e yei chakri ym yohlaad ki neibhah ka sorkar ka pdiang ko ya ki bru kiwa na baar.
Da pyntip u leh wa neiliang u James da kular u wa neibynta ki kaam Contract leh daw yaklam wow thung noh katkam ka Reservation Policy.
Neiliang u President, u Wellbirth Rani da ong u wa lada ki chnat krehkaam ka sorkar pyrdi ye ki wow phah wei wow bood ya ka Reservation Policy hawa ekti cha kiwi wa thung wot ya ki kaam wa khian wa nai, ym em i eh ya ka MeECL wei wow bood ya katai ka jooh ka rukom yow lait chah ktah ki khynroo khyllood wa thooh kaam ka jylla, wei pyntip u wa u Montri u sdang u ya ini i rukom krehkaam na ka MeECL wow pynyoh ya i hok katkam ka Reservation Policy.
Hawa yaklam wa u James Sangma hajrong i yachem wa kiwa yahkhmat ka FKJGP, da pyntip wa ka seiñ da pynsñiaw ko yei sñiawkhia hajrong i pyndooh bordiñ neibhah wa ktah ko ya ki khynroo wa dang em Exam, heiwa da pyntip wa neiliang ka sorkar ka pyrchang ko wow pynbait wei pynneh bait du 3 kynta.
Da pyntip u leh wa ha i yachem da yaklam leh ya i thmu yong ka sorkar wow chna ya ka Umngot Hydro Power Project, neibhah wa man ko kawa emkaam bha kawa ye wow pynmih bordiñ hadooh 210 MW wei daw yarap ko chiboon ya ka jylla kawa dang duna bordiñ, wei kamjooh ya ki paidbah ka thaaiñ. Da ong u wa ka sorkar ka smat ko wow ap yei sñiaw ki paidbah hachwa wow lai chakhmat neibhah wa kwah wow yoh ya i krehlang wei ym toh wow ktah yei jakpoh yong kiwa chong chnong na itai i thmu yong ka sorkar.
Hawa yatoh wa i thung ya u M K Chettri kam u Director (Distribution), u James da ong u wa ka chnat da leh ko katkam ki kyndon krehkaam, heiwa da pynrap leh wa i em ki sahep ki wym yahap wow thung ha i kaam neibhah wa emkaam ya ki Engineer na ka laiñ Electrical, neibhah kamwa man katni, ki Engineer kiwa rap hachwa toh na ki laiñ Civil Engineer, tangwa da ong u wa ya ini i kaam daw bichaar biang.
