Shillong: I pynmih hukum ka yungbichaar ka Meghalaya High Court wow pynkrehkaam noh ya ka Limitation Act 1963 ha ka jylla khamtam ha ki thaw wa haap hapoh ka 6th Schedule, da pynman ko ya ka Hynñiewtrep National Youth Front (HNYF) wow kyntu ya u CEM ka KHADC, u Pynshngaiñ N Syiem wow thooh bniah u chaphang ini wei wow pyrchah u ya kani ka hukum.
U General Secretary ka HNYF, u Sadon Blah hawa yaklam u wa kiwa thoh khubor hadien wa ka seiñ da yachem ki wa u CEM yow yaklam chaphang ka hukum wa pynmih ka Meghalaya High Court ha ka 12.05.17.
Da ong u wa katkam ka hukum yong ka Supreme Court ya ka aiñ Limitation Act ym ye wow pynkrehkaam ha ki thaiñ sah ki ri-loom wei katkam wa pynbna da ka sorkar Assam ha u snem 1966 da klam che wa ya kani ka aiñ ym ye u pynkrehkaam hapoh ka jylla.
Da pyntip u leh wa i pynmih hukum yong ka High Court wow pynkrehkaam ya ka tai ka aiñ ha ka jylla toh wa neidaw wa ka Meghalaya da yoh ko u man kam ka jylla nadooh u snem 1971 wei i pynbna yong ka sorkar Assam ha u snem 1966 da kheiñ wa man ko kawa da yap.
Da ong u, “Lada yaklam i chaphang i yada kyrpang ya ka jaidbru lyngba ka 6th Schedule wei u pynkrehkaam won ya ka aiñ wa mynjur da ka Parliament khlem da kheiñ won ya ki aiñ wa da pynkup bor ha ki Autonomous District Council ym emkaam de u booh ya ka 6th Scheduled”.
U Blah da ong u leh wa neidaw wa ka seiñ dang sñiaw chngaaiñ ko yei em ki District Council, emkaam wow ujor smat khnang wa i yada kyrpang katkam ka riti shynchaar ka ri u neh ki ha kani ka jylla.
Neiliang u CEM ka KHADC, u Pynshngaiñ N Syiem da ong u wa daw pynman yalang u wa kiwa stat aiñ yow ya phyllu yumut hei yatoh wa kani ka aiñ wei daw ujor pyrchah yei pynkrehkaam ka High Court ya ka.
Ka Limitation Act 1963 toh ka aiñ kawa booh da i por wow ujor pyrshah ya iwon iwon i kaam namo ki rai wa pynmih da ka yungbichaar wei lada em wa ujor hadien wa kut i por, ka yungbichaar ym bien de ko wow pdiang ya ka ujor.
Discussion about this post