Ka HYC-Jaiñtia Hills District Unit da lai e dorkhat ko ha u Deputy Commissioner ka West Jaiñtia Hills District hapoh i yahkhmat u Phaikti Suna, Organising Secretary Jaiñtia Hills District chirup wa u Thuhlad Passah, Asstt. Environment Secretary Jaiñtia Hills District, yow pynsñiaw yei eh ki paidbah kiwa su bai bordiñ lada pynkrehkaam da ka UGO Billing System, heiwa neiliang ka seiñ da pyrchah joor ko yei pynkhrehkaam ka MeECL ya ini i rukom saam bai bordiñ cha kiwa pynemkaam, khamtam cha ki thaaiñ nongkyndong deiwa leh da ini i rukom wa thymme.
Ka seiñ da ong ko wa lada ka MeECL pynkrehkaam ko da kani ka rukom e bai bordiñ (UGO Billing System), ki paidbah daw chah ktah joor ki 5-10 chah, neidaw wa u Meter uwa em ha yung ki bru wa ha yong ka MeECL ym toh i jooh, neibhah ka Unit da phær bha ko cha ka 3000 hadooh 10,000 Unit.
Da ong leh wa neidaw wa ya ka Contract, ka MeECL da e ko cha ki bru samen ya wow lai saam bai bordiñ kamtæ daw yaphær ka Meter Reading wa em ha yung ki bru wa ha i rukom kheiñ namo ka System wa em ha ka MeECL.
Kamtæ daw joor i antaad ya ka bai bordiñ da kiwa lai kheiñ bordiñ. Neibhah wot ya ka bai bordiñ leh em ki por wa da e hi-eh cha luti lane cha yung kiwa jan yung katkam wa yoh yutip na ki paidbah kiwa chong chnong ka thaaiñ. Wei ini da jia i boonsien neidaw wa duna ki wakreh wa leh ya ka Meter Reading yow ye u pynpoi ya ka bai bordiñ hadooh ha yung kiwa em cha nongkyndong iwa da pynman leh yei phær i rukom kheiñ bai bordiñ.
Da booh leh yei kyrpaad ya ka MeECL neiliang ka seiñ wow sñiawbha ko u pynsñiawthooh paidbah chwa khnang wow lait ki paidbah u kulmar khamtam ha kani ka por wa em ka khlam COVID-19 wa da chem jynjar ki bru. Toh u pynbait chwa ya i rukom kheiñ bai bordiñ namo ki Reading yong kiwa pynemkaam bordiñ chwa wow sdang ya ka UGO Billing.
Kamwa pynemkaam ki da ka ELBIS ha kini ki por wa da dep hap wow leh chwa da katæ hi ka warim, lym kamtæ neiliang yong ka seiñ u pyrchah joor ko ya kani ka UGO Billing kawa wan kam ka la-ær khlem i batai pynche chwa.
