Ka Hynñiewtrep Youth Council Jaiñtia Hills District Unit hapoh i yahkhmat u Romingstar Lamare, General Secretary Jaiñtia Hills District wa u Phaikti Suna, Organising Secretary Jaiñtia Hills District deilang wa ki dkhot da lai e ki dei thoh cha u Deputy Commissioner ka West Jaiñtia Hills District yow pynsangeh chwa yei thmu pyndait Smart Meter ka sorkar ha waroh kawi ka District lyngba ka Company Satnam Global Infraproject.
Heiyatoh wa ini i thmu ka sorkar, da ong ki wa neiliang u Assistant Executive Engineer, Khliehtyrshi Distribution Sub-Division MePDCL, haka 12/05/2021 da phah u ya ka chithi cha kiwa chnong wa kynthup yaka Ummulong, Wahiajer, Mukhla Mission, Mukhla Shohshrieh, Mukhla Umlangshor waka Lad Mukhla.
Ka seiñ da ong ko wa ini i thmu yong ka chnat krehkaam da leh khlem i pyntip chwa cha ki paidbah wa chong chnong, heiwa da hukum bait ya ki bru yong ka Company wow lai pyndait ki ya u Smart Meter.
Neiliang ka seiñ pyntip ko wa hei yaklam ko wa ki kattu katni ngut ki waheh chnong ong ki wa ki leh ym em yoh yutip ki iyi iyi heiyatoh wa uni u Smart Meter.
Ka seiñ hi pyrchah joor ko hajrong ini i thmu ki bru yong ka Company wow wan psiah chapoh ki chnong ki thaw khamtam ha kam kini ki por wa ka sorkar pynrkhiñ bha ko heiyatoh u yakhun yaka khlam COVID-19, najrong wa wot ki paidbah leh wym pu em sñiawthooh ki ya uni u Smart Meter.
Da ong wa ini daw ktah bha ko ya ki paidbah wa hap ki u thied Meter boonsien najrong wa u Meter yong kani ka Company man u uwa syad. Heijooh i por ong ki wot ha sor leh ym pu em pynkrehkaam ki ya uni u Meter kammon se da pynkrehkaam syndon cha nongkyndong wa dang boon kiwa dooh wa duk.
Kamtæ ka seiñ kyntu joor ko yaki waheh chnong wada yoh ya ka chithi wow kyntait syndon ki, wei waroh hi leh ki waheh chnong wa em hapoh Ri-loom Jaiñtia wym toh u pdiang ki ya uni u jait Meter wa wan pynbiej ka Company cha ki nongkyndong uwa ye u ktah hadien habood.
Iwa pynphylla chooh chooh yaka seiñ wa kammon hi ha kam kani ka por wa ki paidbah dang yakhun ki ya kani ka khlam COVID-19, heiwa ka sorkar leh da khang ko yei lai i wan na iwi i thaw cha iwi, kat u yoo ka hi wa e laad ya kani ka Company wa na baar u wan psiah laitlooid ko cha ki chnong ki thaw hapoh ka jylla.
Neiliang ka HYC kamwa da pyrchah joor ko nadooh wa sdang ka MePDCL wow pynkrehkaam ya uni u Smart Meter, da dep yachem ko leh wa u Power Minister heiyatoh wa kammon ka sorkar thmu ko u pynkrehkaam hapoh ka jylla yong i kawa dang duna hei yoh i kot.
