Ka seiñ HYC da thoh ko cha u Symbood Montri Rangbah ka jylla, u Prestone Tynsong wow pyrchah yei dawa ka Harijan Panchayat Committee (HPC) yow mih na Them Iewmawlong deiwa e i thaw wa mar 200 Sq Meter samen wa i yung mynkna cha ki manyung pyn hapoh ka Shillong European Ward.
Ka seiñ da ong ko wa i dawa ka HPC toh iwa ymye wow pdiang la man katwa man leh wei iwa man pyrchah ya ka aiñ neibhah katkam ka soskular wa soi wa u Syiem ka Hima Mylliem ka sorkar da chimkti wei da mantre ko ya ini i thaw ha Them Iewmawlong wei da su ko leh ya ka Hima Mylliem.
Chooh chooh ka HYC da ong ko wa em ki bru wa sah ha ini i thaw toh kiwa kreh ka SMB wa kiwi ki chnat sorkar wei emkaam wow kyrriah ya ki cha ki Quarter sorkar kamwa leh ya kiwi tawon deiwa e leh ya ka bai yung namo ka House Rent Allowance neibhah lada e thaw mynkna ya kini ki bru na Them Iewmawlong kiwi kiwa kreh sorkar leh daw dawa ki kamni i jooh.
Chooh chooh da kdaw ko wa lait na kiwa kreh ka SMB wa ha kiwi ki chnat sorkar, kiwi tawon kiwa sah ha Them Iewmawlong toh kiwa sah tooh pyrchah ya ka aiñ kamtæ i wow kyrriah ya kini ymtoh u mih i wei da toh u beh noh ya ki na ini i thaw. Wei lada pdiang ka sorkar yeiwa dawa ka HPC daw man iwa sih ya kiwi ki bru kiwa ym em thaw hapoh ka jylla.
Kamtæ ka HYC da dawa ko wa ka sorkar ymtoh u pdiang ko yeini i dawa ka HPC.
