Ka seiñ Jaiñtia Students’ Movement Eastern Region (JSM-ER) hadien wa da yoh yutip ka wa da em i thmu neiliang ka MeECL wow lai ko chakhmat wow pynkrehkaam ya u Smart Meter lyngba ka Company Satnam Global Project Infra Ltd. ha East Jaiñtia Hills District, da lai yachem wei da e dei thoh wow pyrchah hajrong ini i thmu cha u Deputy Commissioner ka East Jaiñtia Hills wa cha u Executive Engineer MeECL, Moowakhu East Jaiñtia Hills District.
Ka seiñ da ong ko wa i thmu wow pynkrehkaam ya u Smart Meter wa thymme hapoh ka District khlem da i pynsñiawthooh paidbah ye ko u wanrah yei eh wa i khuslai yei rukom kheiñ wei ye u ku ka bai bordiñ ki paidbah yong ka thaaiñ kiwa boon hi toh kiwa chong chnong kiwa im du hei rep wei khih mylla sngi.
Chooh chooh da ong wa da jooh sakhi leh wa boonsien wot i rukom krehkaam (System) wa pynemkaam kattæ wym biang bha i wow kheiñ bai bordiñ, lada pynkrehkaam sa ya u Smart Meter wa thymme daw chem yei eh wa hap bood ya kani ka System wa boon ki bru ym sñiawthooh ki kammon krehkaam kini ki Meter.
Kamtæ ka seiñ da yieñ pyrchah joor ko wow pynkrehkaam ya u Smart Meter hapoh ka District lait noh hadooh wa da dep pynsñiawthooh paidbah cha waroh kiwa chong chnong.
