Ka JSU- WJC da pyrchah joor ko ya i khayi hapyrdi ka India wa Bangladesh wa ka sorkar jylla da e bor ko wow leh neidaw wa ka Bangladesh wa dang em ko hei maa naka khlam COVID-19. Ka seiñ da ong ko wa lada ka khayi pateiñ u man ko kamwa jooh man, khlem pep daw wanrah ya i poor smat uni u khñiang cha Meghalaya leh.
Ka JSU-WJC da kwah ko wow paan pynche naka sorkar jylla wa lada ka khayi lyngba ki Land Custom em ki ki yada ya kiwa yah kari waki wakreh ha khappood. Da kylli leh lada em wa yoh ya uni u khñiang kiyi wow kitkhlieh, kiyi wow su ya i lutsan hanla ka khayi ha Dawki toh du wow chalan ya u moochuni na Nongtalang wa na Pynursla.
Da kylli leh wa wa ileh wym pynemkaam noh yaka poisa yong ka District Mineral Fund neibynta wow pynbiang ya i sumaar wa kiwi katkam wa phah ka sorkar pyrdi.
Ka JSU-WJC da maham ko leh wa ym pdiang ya ini i chah ka sorkar katwa ym pu biang i booh kyndon wa i rukom pynkrehkaam ya ki kyndon wow chalan mar cha Bangladesh.
“I pyrchah joor i khamtam yei psiah ki mar na Bangladesh. Ym kwah i leh i wow yabi ki bru na India wa Bangladesh,” da ong ka kyrwoh na u President ka War Jaintia Circle u Eddy Kery Pohtam.
