Ka Jaiñtia Students’ Union-Central Body kamwa man nawa sdang, ha kani ka kynti leh da pyrchah ko yei thmu wei dawa ka Synjuk Ki Dorbar Shnong Shangpung wow kyrriah ya ka yung krehkaam ka PWD North Division na Jowai cha chnong Shangpung deiwa beiñ joor yeini.
Ka JSU da ong ko wa kani ka synjuk da kam ko wa kani ka Division pait ko du ya ka Laskein Block, tangwa du neidaw ini toh u kyrriah noh mo ya kani ka yung krehkaam hajrong wa da em chwa ka Sub-division kani ka chnat ha Shangpung? Hawa kamtæ toh hi mo wa ya ka PWD South Division leh u kyrriah noh cha Amlarem neidaw wa pait ko ya kani ka thaaiñ?
Ka seiñ da kylli ko leh cheiwon u wiar i burom ka District neibhah wa ya ki Head Office dang dawa kyrriah na Headquarters ka District. Ileh du kiwa na ka Laskein Block mo kiwa lai emkaam cha ka PWD North Division? Du ki Contractor wa na Laskein Block mo ki wakreh ha North Division? Kammon wa ki bru na kylleiñ ka Ri-loom Jaiñtia du neibynta i kaam wa khian u lai pynlutsan ki cha Shangpung deiwa kyntu yaka Synjuk wow pyrkhat yillu wei wow pyrkhat jngai ko ymtoh du hajrong i myntoi samen donhi.
Chooh chooh ka seiñ da ong ko wa ini dawa kulmar yong ki daw wanrah i yei thut wei kulmar ya kiwi tawon ki chnat khrekaam ka PWD kam ka yung krehkaam u Superintending Engineer PWD, ka Treasury wa kiwi ki chnat ka sorkar.
Heijooh i por ka seiñ da ong ko wa kamwa kam ka Synjuk da ong wa i em ka Division hapoh Jowai da pynkhynñia i ya ka sor Jowai, deiwa kylli wa kat kiwa yahkhmat ka Synjuk Ka Dorbar Shong Shangpung pynbaad kulmaar hi-eh ki khlem tip heiwon em kani ka yung krehkaam katni wei heiwon wa khynñia hapoh sor Jowai.
Ka seiñ da ong ko leh wa ini i dawa ka Synjuk toh e daw donhi wow pynbiej ya ki bru ka Ri-loom Jaiñtia waroh kawi.
Kamtæ ka seiñ da ong ko wa hajrong kini ki yurim da pyrchah ko yeini i thmu deiwa dawa na ka sorkar jylla wow dam u ap yei dawa ki kattu katni ngut donhi kiwa kwah wow myntoi samen wei emkaam wow ap ya ki paidbah neibynta i bha i miat yong waroh salonsar.
Kani man ko katkam ka wyrta na u Lawyerson War, President ka Jaiñtia Students’ Union-Central Body.
