Pyrchah ka Khimusniang yei wan ki seiñ khlem da pyntip yow tuklar ya ki kaam ka chnong

Ka Dorbar Chnong Khimusniang, Jowai da pynche ko heiyatoh wa u sarok wa lai cha ka Water Treatment Plant ka PHE wa em ha Oorkhla iwa man i thaw wa dang haap hapoh ka chnong hi deiwa ong wa neipor cheipor da lai kyrpaad ko ya ka sorkar wow pynchna noh ya uni u sarok nadooh ka Synod 2008.

Da pyntip leh wa da dawa wow chna ya ka Reservoir Tank kawa heh yow pynpoi um cha ki dong ki kyntoit ka Khimusniang wei da lai yachem leh nadooh ya u Deputy CM, u Prestone Tynsong uwa pait leh ya ka chant PWD, u Samlin Malngiang uwa jooh man kam u Montri ka chant PHE ha u snem 2019.

Nietæ dadep leh u yachem wa u Wailadmiki Shylla, MLA ka Jowai deilang u E.E. Electrical Division, PHE, u Paul Synnah. Da pyntip leh wa dadep yachem boonsien wa u MLA wei neiliang yong oo leh hadooh kattæ dang booddien u yeini i kaam.

Neiliang ka Dorbar Chnong Khimusniang da pynsñiaw ko leh yei kmen wei sñiawngooh ya u MLA wa dei kreh chitom u da ye wow pynyoh ya ka Reservoir Tank kawa dadep leh wow chna wei da sah sa du wow pynemkaam.

Related posts

Hap chong Helicopter u Lat ka Manipur 6 Km hadien wa dawa paan maap ki paidbah

May 27, 2025

Paan yarap u CM ka MP na u Conrad wow yarap thooh ya ki chi jur wa dang dep bia kiwa wiar ha thaaiñ Sohra

May 27, 2025

Heiyatoh wa u sarok da pyntip wa dang yang ya ka khubor na u MLA yow pynkreh noh ya ka tangwa iwa sñiawsih won wa manda yoo ha ki laad pathai khubor wa u Montri ka chnat PHE, u Marcuise N Marak deilang wa u MLA ka Jowai da wan poi ki cha Oorkhla deiwa kular ya ka JSU wow pynkreh noh ya utai u sarok. Ini ym mut i wa pyrchah yei pynkreh ya u sarok tangwa iwa sñiawsih toh wa khlem da pyntip chwa næ khut ya ka Dorbar Chnong Khimusniang.

Ka Dorbar Chnong Khimusniang da pynkynmoo ko wa neipor cheipor wa da maham ya kiwon kiwon ki seiñ (NGO/Association) wow wan biah Poster næ wow leh kiwon kiwon ki kaam hapoh u pood u ang ka chnong khlem da yoh bor khlem da tip ka chnong.

Ka Dorbar Chnong Khimusniang da kyrpaad ko ya waroh ki chnat yong ka sorkar wow ya ksohktilang wa ka chnong wa lada chwa wow pynkrehkaam ya kiwon kiwon ki kaam ki Scheme ki Project hapoh ka chnong wow pyntip chwa cha ki bor ka chnong.

Heijooh i por ka chnong da khang pyrchah ko ya ki bru samen, ki NGO, ki Association wow paan Scheme na ki MLA, ki MDC wa na ki chnat sorkar khlem da yoh bor næ lai lyngba ka Dorbar Chnong Khimusniang, neibhah ka chnong dadep ko wow lai e namo wow Submit ya kiwa boon ki Scheme neipor cheipor cha ki MLA, ki MDC wa ki chnat sorkar.

Kamtæ da kyrpaad ya phi sa chisien wow ksohkti deilang wa ka Dorbar Chnong Khimusniang wei lada chem wa em kiwa lai lait wei kiwa leh pyrchah ya ka chnong sa chisien, daw pynsangeh ya kiwon kiwon ki kaam wa da pynkreh kiwa haap hapoh u pood ka chnong.

Puræ leh: Kular u Montri ka chnat PHE wow pynchna ya u sarok Oorkhla wa lai cha ka thaw pynkhooid um ka Jowai