Yei jhep na Iawmusiang wa em mar pyrchah ka yung krehkaam u DC Jowai, na laad Thomas Jones Synod College wa na Iawthymme iwa da thap haki Truck Dumper nadooh ynnin i miet hadooh hynne sngi, da thmu wow linoh ha Pangit i thaw ka JHADC wa em ha Khliehtyrchi, West Jaiñtia Hills.
Tangwa ini i thmu wow li noh da man i iwa sepai neibhah ki paidbah wa pyrchah da yang chwa ki haka laad wa em hajan Hilltop wow lai cha kani ka thaw wa thmu u noh.
Ha kani ka thaw wa em ki paidbah wa pyrchah da hiar lang leh ki pulit waki Magistrate ka West Jaiñtia Hills District, wei hadien wym e lad hi wot ki paidbah u linoh, waroh ki truk da dong biang ki cha Jowai.
Neiliang u waheh chnong ka Khliehtyrchi u Kitbok Rymbai da pyntip u wa ynnin da miet yoh chithi ki kawa da dep rai ka Executive Committee yong ka JHADC wow noh yei jhep cha ini i thaw wei oo leh khut u smat smat yaka yalang chnong hei step ka 22 tarik, wei napyrdi ki paidbah em kiwa kyrchaan wa kiwa pyrchah. Te neidaw wa em kiwa pyrchah da pyntip u chaki bor District wym ye u lai chakhmat.
Tangwa hei miet won yoh Phone u naki paidbah wa wan ki dei miet kamtæ oo leh da wan mih u cha kani ka thaw. Heiwa neiliang ki paidbah da ong ki wa ini toh i wym burom ya ka chnong wei ileh wa hap wow wan u leh yeini dei miet hawa da pyntip wym chah ki.
Na pyrdi ki paidbah wa klam leh da pynrem joor ki yeini wei ong ki ye u man em yi re i yi cha lyndet wa hap ki u wan dei miet wei u pyrchah bait ki lada ym e u leh da ka rukom wa man katkam ka juk stat wa katni namo ka Scientific Waste Management neibhah i noh chi por donhi deilang wa ki Plastic daw ktah ko leh kamjooh ya ka um wa em chajan kamjooh ya ka rymaw.
Pyn ha kani hi ka miet hadien wada uiñ biang i jhep cha Jowai da chem wa ha luti wow lai cha Thomas Jones Synod College da pynhap yei jhep iwa da andat kamwa 2 Dumper haroh wei dang em sa soo tylli kiwa dang em deiliang wa i jhep wa dang sah cha luti hadooh wa pynmih ya kani ka khubor.
