Jowai: Neipor cheipor, ka sorkar Assam da pynyoo ko ya ki kaam lehbor yong ka ha ki thaiñ Block 1 (Pangam Raliang) wei da tyngkheiñ ko ya ka Status Quo kawa da em waka Meghalaya.
Ha ka 29-01-2018, da pynyoo biang ko ya ki kaam wym burom yong ka ya ka jylla Meghalaya deiwa tih khyndaw ya ka thaw wa em ha Khatkasla wow chna Police Outpost.
Ka KSU Jaiñtia Hill District Unit ka yieñ skem ko hajrong ka yurim wa ki jaitbru yong i kiwa em ha ka thaiñ khappood em ki ka hok wow yieñ wow kyntait wow pyrchah yei booh ya ka Outpost ka Assam.
U Albinus Lamurong, Assistant General Secretary ka KSU JHDU da ong u wa ini i booh ya ka Police Outpost ka Assam ymtoh wow pynchngaiñ ya ki paidbah toh wow pyndik pyntieñ ya ki paidbah nadooh ka rukom im wa man ka sngi hadooh ka khayi pateiñ ki bru khian paaid yong i.
Chooh chooh da ong u wa ym ye u mylliñ yei talasi kini ki jooh ki pulit Mukoiloom ya ki warep, kiwa lai wa wan cha chiliang ka Tihwieh ha ki snem wa dadep wei da khanglaad leh wow kit chyiap næ kiwi ki mar khayi. Kamtæ ymye u ong wa kini ki jooh ki bru ye ki wow pynchngaiñ ya ki paidbah wei ymye u pdiang ya ki hapoh ka Block 1.
U President ka KSU JHDU u Ohibait Dkhar da ong u wa ymye u mylliñ yei phet yut chnong cha Sakhwei (Sahsniang) heiwa ka sorkar Assam wa ki pulit yong ka man ki du kam kiwa paitke wei ym chimkhia ki yeiwa jia.
Wei hajrong ini ka seiñ da pynsñiaw ko yei pyrchah ya ka sorkar Assam wei da kyntu ko ya ka sorkar Meghalaya wow chimkhia ko hajrong ini wa jia.
Discussion about this post