Jowai: Ka KSU Laskeiñ Circle da thoh ko cha u Deputy Commissioner ka West Jaiñtia Hills wow pyrchah ya i thmu ka sorkar Meghalaya wow chna thaw booh pulit ha ka chnong Tumtum.
Ka seiñ da ong ko wa i thmu ka sorkar Meghalaya wow chna ya kani ka thaw sah ki pulit Meghalaya haka chnong Tumtum pynyoo ko wa ka sorkar Meghalaya da leh khonswet ko yaki paradoh parasnam yong i kiwa chong wa sah cha chilliang yong ka wah Myntang kiwa haap haka Block-I nadooh ka chnong Psiar, Khatkasla, Moojem wa Mooluber neidaw wa ka chnong Tumtum toh ka chnong wa jngai naka wah Myntang wei ka man ko leh ka chnong kawa chongsuk chongsaiñ ka chnong ka wym jooh em i ka khajia wa i kynad.
Ka seiñ da ong ko wa lada ka sorkar Meghalaya booh ko ya kani ka thaw du haka chnong Tumtum pynoo wa ka sorkar Meghalaya da e dak chwa ko yaka sorkar Assam ya u pood u ang wei man ko leh i sñiawsih yaki paradoh parasnam yong i kiwa chong wasah cha chilliang yong ka wah Myntang neidaw wa ki da tip lypa ki wa daw dooh noh yaka thaw ka bhaw wa ya i mantre yong ki.
Neiliang yong ka KSU Laskeiñ Circle da pyrchah joor ko ya i leh tieñ yong ka sorkar Meghalaya neidaw wa heithaw wow paan yada yaki paradoh parasnam yong i wa sah cha Block-I tangwa da yoo kamwa da myllin chwa ya ki paradoh paranam yong i kiwa chong wa sah cha chilliang yong ka wah Myntang kiwa daw chaah baam haka sorkar Assam ha kawi ka sngi.
Ka seiñ dawa ko naka sorkar Meghalaya wow booh ha chnong Khatkasla lane Psiar wei lada ym booh ha kini ki thaw, ym emkaam yaka Police Outpost haka Block-I.
Discussion about this post