Jowai: Ynne ka sngi ki bor district ka WJH ha Jowai da beh ki wei da khanglaad ya kiwa chongdai madan ha ki luti lai kjat yong ka Iawmusiang wei ya kani da leh chirup wa ki bor ki pulit wa ka Jowai Municipal Board.
Hajrong ini, ka KSU Laskeiñ Circle da pynsñiaw ko yei sñiawkhia hajrong ini i leh embor ka sorkar neibhah khlem pyrkhat ko heiwon u chong dai ya ki mar ki mata wa ki jhoor ki soh lada ym em thaw wow chongdai ki.
“Ka sorkar toh u pynbiang chwa ya ki thaw namo ki yung chong dai chwa wow beh ya kiwa chong dai wei lada beh hi-eh ym dam ko u wanrah yei dooh nong wa i chitom ya ki nongkyndong kiwa chaniah ha ka rep ka riang kam kawi na ki laad kamai kajih wow pyndap ya ki yung ki sem,” da ong u Balawan Suchiang, President KSU Laskeiñ Circle.
Da pynrap u deiwa ong “Lada kyruiñ won cha ka kaam rep kaam riang, barabor em ka leh chiliang khmat ya ki nongkyndong wei lada khanglaad sa i dai, cheiwon ka mynried yong ki bru naka thaiñ Laskeiñ Block kiwa boon ki warep boon leh kiwa phah puræ skur ya ki khon kiwa yoh kamai lyngba ka rep ka riang”.
“I kyrpaad joor i ya ki ar ngut ki MLA na Laskeiñ Block yong i, u Coming One Ymbon wa u Nujorki Sungoh wow tuklar hajrong kani ka kaam.” Da ong u Garland Manner, Assistant G.S ka KSU Laskein Circle.
Ka seiñ da ong ko leh wow pynsnmat wow chna pyndep ya ka Iawmusiang Market Complex khnang wow pynsuk ya kiwa dai madan.
Da kyntu leh ya ka District Council wa ki bor sorkar wow khyndang leh ya ki dukan be-aiñ ki baar jylla ha ri-loom Jaiñtia kiwa boon ha Jowai khnang wa ki tre chnong u yoh ki u kamai.
Discussion about this post