Ka KSU Narpuh Circle da pynsñiaw ko yei pyrchah ya ka Public Hearing wa daw pynman neibynta ka Star Cement ha Lumshnong, EJH kawa da paan bor yow pynheh chooh chooh yei bor deiwa pyndait ya u Line-II wow pynmih Clinker sa 3.3 MTPA, Cement sa 2.0 MTPA wa ya ka Waste Heat Recovery Boilers (WHRB) sa 15.5 MW iwa mut wa waroh daw man wa ye u pynmih 4.09 MTPA i Clincker, 2.99 MTPA i Cement wa 20.17 MW i Waste Heat Recovery Power Plant ha chnong Lumshnong.
Ya ka Public Hearing da booh wow pynman ha ka 29-01-22 heipor 2:00 waje i sngi.
Ka KSU Narpuh Circle da ong ko wa i paan ka Star Cement wow pynkhlan bor sa 15 MW hap wow pyrchah neibhah ka jylla dei bor yong ka ye ko wow pynmih du 340 MW donhi wei ha ki por wa khlan bha ki bru wow pynemkaam bordiñ ym yoh palat 160 Volt heithaw 220 Volt.
Ka seiñ da ong ko leh wa 15 MW da ye wow e bordiñ cha ki 15,000 tylli ki yung wa em cha palatsor kam i rukom pynemkaam bordiñ ki bru da ka 1 KW iwa da man kamwa chim yei bhah yong ki bru.
Neiliang ka KSU da kypaad ko ya waroh ki khynthai wa chynrang wym toh u chah pynbiej ki, wei ym toh wow ang spah, wym toh u ap yeiwa phon wa pah kiwa thok wa chukor.
