Ka seiñ Khasi Students Union wa ka Federation of Khasi Jaintia & Garo People kiwa napoh ka thaaiñ War Jaiñtia, da pynsñiaw ki yei wym sñiaw yahap yei thmu ka MeECL wow pyndait ya u Smart Meter hapoh ka Amlarem Sub-Division waroh kawi.
Kini ki seiñbhalang da e ki leh yei thoh cha u Executive Engineer yong ka MeECL hapoh ka West Jaiñtia Hills District yow e yumut wow pynsangeh chwa syndon ya ini i thmu pyndait Smart Meter hapoh ka thaaiñ. Ka yurim wa kini ki ar seiñ da pynsñiaw ki toh wa emkaam chwa i pynsñiawthooh wa che cha ki paidbah ya uni u Smart Meter wa lada uwa e myntoi næ ym em wei kammon u pyndait hi-eh hawa ki paidbah ym che ki.
Da ong leh wa ha kam ini i por wa dang joor i poor u khñiang khlam, man ko iwa maa lada jia wa wan ki bru yong ka Company chapoh ka thaaiñ khamtam yow psiah cha ki yung bru wei sa iwi leh toh u pyntip che cha ki bor chnong chwa wa kani ka Company u wan pyndait ko ya uni u Smart Meter khnang wow yoh u pyrkhat sani bha hajrong ini i thmu yong ka MeECL.
Kani toh ka kyrwoh kawa phah da u Laitphar Syngkrem, President ka KSU–War Jaintia wa u Reachingson Kongwang, General Secretary ka FKJGP– War Jaiñtia.
