Jowai: Ka Khasi Students’ Union (KSU) War Jaiñtia Circle hapoh i yahkhmat u President, u Laitphar Syngkrem wa u Finance Secretary u Kindly Khyriem ynne ka sngi da lai ki wow ujor wei wow dawa na u Officer In-charge yong ka chnat Home Guard wa pait ya ka yingkeiñ Dawki.
Ka seiñ ka dap ko da i sñiawkhia kawa joor hadien wa da yoh yei ujor naki paidbah wa em ki kari wa kit mar palat ya ka 9 Metric Ton kiwa lai lyngba kani ka yingkeiñ Dawki, kawa booh yei ma ya kani ka yingkeiñ neidaw wa kiwa chong chnong ka thaaiñ Dawki emki du kani donhi ka yingkeiñ kawa man ka bud-loom ya ki ha ka lai ka wan, ka khayi pateiñ, ka lai kit ya kiwa chitom cha Shillong wei lada kani ka yingkeiñ tkut syndet ko, daw booh ya i eh wa khroo ya ki paidbah.
Sa kawi leh da ong ka seiñ wa kani ka yingkeiñ man ko kawa da rim kiwa da chna nadooh u snem 1931 wei ym toh u kheiñ stiñ wa man ko kawa dang chkeh wei emkaam wow yada ya ka khnang wa ka lai ka wan man ko kawa lai bait neidaw wa ym em luti de da iwi lada tkut syndet ko.
Ka seiñ da booh ko ya i dawa ya kiwa toh u pait ya kani ka yingkeiñ wow pynchkeh wei wym toh de u chah ya kiwon kiwon ki jait kari kiwa kit maar mata palat ya ka 9 Metric Ton.
Kamtæ neiliang u Officer In-charge da kular u wow chimkhia wei ym chah dei neini ya ki kari wa kit palat pood wow lai lyngba kani ka yingkeiñ wei da pdiang u leh wa em ka kit palat pood ki kari ha ki sngi wa da dep.
Ka seiñ ka da pyrchah joor ko ya i kit palat pood wei daw sylli ko ya ini na ki por cha ki por.
Ini toh katkam wa pyntip u General Secretary u Lurman B. Talang.
Discussion about this post