Ka Khasi Students’ Union (KSU) lyngba kani ka kyrwoh khubor da pynsñiaw ko yei pyrchah joor hajrong i thmu ka sorkar wow e laad biang ya ka North East Frontier Railways (NFR) wow sdang u chna biang yaka luti rel ha Byrnihat.
Ka seiñ da ong ko wa katkam wa da yoo ha kawi ka ka kotkhubor ynnin ka sngi wa ka sorkar jylla lyngba u Prestone Tynsong da e bor ki ya kiwa pynlai District ka Ri Bhoi wow pynbait wa ka NFR ya ini i thmu wow sdang biang yei kreh chna luti rel, kamtæ ka KSU ka pynsñiaw ko yei khyrngiat wei chrai hajrong ini i rai yong ka sorkar.
Da ong leh wa kamwa da tip wa ka phang luti rel da pyrchah joor da ka KSU nadooh u snem 1989 hapoh i yahkhmat u Bull N Lyngdoh iwa da yoh yei kyrchaan wa pura na ki paidbah wei dang pteiñ i hadooh katni neibhah da tip chwa wa khlem kiwon kiwon ki aiñ wa pynrkhiñ wei wa khlan wow kdoh u khoom yei wan buhai chnong ki mynder, ka rel daw man ko ka kabu wei ka laad wow pynsuk ya ki mynder wow wan buhai chnong hapoh ka Bri U Ynñiawtrep.
Chooh chooh da ong wa i leh jhan ka sorkar wow chim ya katai ka rai pynyoo ko wa thrang hir hir wow wanrah ya ki mynder cha jylla wei ym em i kitkhlieh ya ki tre ri neibhah wym jooh chim rai syndet næ jhan hawa yatoh wa ki aiñ næ ki laad wow yada ya ka jaitbru nei chah tlep ha kiwi.
Ka KSU da kyntu ko ya ka sorkar wa ha i thaw wow jhan ya katai ka luti, bha chiboon lada ka pynkhlan chooh chooh ko yei dawa ya ka ILP na ka sorkar pyrdi wei ym du wow kut ha i pynmih khubor. Ka KSU da maham ko deiwa eh wa lada ka sorkar ka lai ko chakhmat ya ini i e bor, wei lada ka NFR ka sdang ko ya ini i kaam, ka seiñ ym yohsa ko wow leh deiwa eh wow pynsangeh ya itai i thmu wa sih wei ki dkhot ka seiñ leh man ki kiwa smat wow chong patok biang, wei wow chah bom chah dat biang ha ki pulit hadooh wow e dei mynsien.
Da pynkut deiwa phah yaka khubor cha ka sorkar, “Wym toh u rhah u pynpoi luti rel palat katni, tangwa toh u kreh minot khop miet wa sngi yow pynpoi ya ki khyrdop ILP ha jylla, lym kamtæ maad yei yakhih wa tyrha”.
