Ka Khasi Students’ Union (KSU) da pynsñiaw ko yei khyrngiat hajrong i mih khubor wa ka Lady Keane College daw hap su ko hadooh T. 45 lak cha ka Cantonment Board kam ka dan bai khyndaw lane ka ‘Property Tax’ kawa da kheiñ nadooh ka 01-04-22 hadooh ka 31-03-23 wei ini toh i wym ye u pdiang khamtam wa kani ka thaw toh ka thaw e sikai.
Ka KSU da booh yukylli ko wa kammon ka Cantonment Board ye ko wow kamtre yei thaw wa em ka Lady Keane College hawa ya kani ka College da seiñ nadooh u snem 1935 boon boon snem chwa wow kha ya ka Cantonment Board wei ym em yurim wow dawa syndet syndet u su ya katai ka dan.
Kamtæ da ong wa toh u tipmit kyrpang ya kam kini ki thaw kiwa da chakri ya ka thaaiñ wa ka jylla da ki phaw phaw snem yow lait na ki jyrwit jyrwat ki aiñ wa thymme ka India wa ka jylla Meghalaya. Neibhah kat cha wa kyruiñ ha pyrthai da yoo wa kreh borbah yow kyntu ya ka puræ puthi neibynta ki kynthai wa sahdien yow ye ki u yieñ ha ki kjat yong ki hi.
Hajrong ini da kylli iyi u leh ka Cantonment Board lada kani ka College ym ye ko u su ya katai ka dan? Iyi wow jia ya kiwa lai puræ ha katai ka College? Kiyi wow bahkhlieh ya ka mynried yong ki? Ye hi ka Cantonment Board wow bahkhlieh? Lane ka sorkar jylla u bah khlieh ko?
Ka KSU da pynsñiaw ko yei pyrchah wa joor ya ini i leh embor ya ki chlem e yei stat kiwa da noh da e chiboon yow pynku ya ka puræ puthi. Ka sorkar toh u tuklar noh ko syndon ya kani ka phang wei ka KSU pynsñiaw ko yei kyrchaan wa pura ya ki bor pynlai ka Lady Keane College.
Puræ leh: T. 45 lak kam i bai khyndaw phah su ka Cantonment Board ya ka Lady Keane College
