Jowai: Ka Khasi Students’ Union, Central Executive Council da pynsñiaw ko yei pyrchah kawa joor hajrong i thmu ka Raid Marwet wa ka Hima Mylliem wow dai ya i thaw ha Lakhra-Beltola cha ki chipai Border Security Force (BSF).
Katkam wa tip ka seiñ, ka thaw wa em ha Lakhra kawa heh hadooh 1000 Hectare da thmu wow lilam noh cha ki chipai BSF da ka Hima Mylliem wa ka Raid Marwet ha i dor kamwa T. 1000 klur.
Ka seiñ da ong ko wa sñiawphylla wa kani ka thaw wa kani ka hima mut ko wow dai cha ki BSF lyngba uwi u Agent uwa na ka kur Law toh ka thaw wa em hapoh ka Hima Sohiong. Kamtæ ka seiñ ka maham joor ko ya kiwa khwan myntoi samen wa ym toh u dai u lilam ya ka thaw u khon Khasi khara cha kiwi ki bru khamtam ya ki chipai neidaw kamwa da sakhi katni wa boon ki thaw ha Bri U Ynñiawtrep da khyrrup lut da ki bor chipai.
Ka seiñ da daw lai yachem ko leh ya ki bor ka KHADC wow dawa u khanglaad ya ini i thmu wa sih wow dawa leh wa ka Council toh u pynchitom ko ya kiwon kiwon kiwa emkti ha ini i thmu wow lilam ya ka thaw kawa heh kamwa mar chiteiñ wa ka sor Shillong cha ki shipai.
Da pynkut deiwa ong kammon ka Raid Marwet kawa haap hapoh ka Hima Mylliem ye ko wow dai ya ka thaw wa haap hapoh ka Hima Sohiong.
Discussion about this post