Ka Dorbar Chnong Mookyrdup da mih ko chakhmat wow pynsñiaw yei pyrchah hajrong i thmu yong ka Jowai Municipal Board (JMB) wow booh yei thaw pynlang jakhlia hapoh u pood u ang ka chnong.
Ka dorbar chnong hadien wa da yoo ko yeiwa da chna ka JMB yeini i thaw pynlang jakhlia hapoh u pood u ang ka chnong wei i thaw toh i wym em jngai na ki yungsah ki bru da chong ko ya ka yalang kawa jhan ha ka 21 tarik uni u bnai heiwa da chim ya ka rai wow pyrchah wei wow pynsangeh noh ya ini iwa chna ka JMB kawa da lai chakhmat.
Kamtæ neiliang u Waheh Chnong deilang wa ki dkhot yong ka Executive Body da lai ki wow booh da ka ujor cha ka Chief Executive Officer ka JMB ha ka 23 tarik yow pyrchah yeini wei da e leh cha u Chairman yong ka JMB wa cha u Chairman yong ka Meghalaya State Pollution Control Board, Shillong.
Neiliang ka Dorbar Chnong Mookyrdup da beiñ joor ko ya ka JMB kawa da leh yeini khlem da pyntip wei khlem da yoh bor naka chnong.
Ini i thaw wa da jied ka JMB toh iwa em ha u sarok Dulong College Road, mar hajan ka wah Rymphum kawa tooid cha ka wah Myntdu wei kamjooh dang em chajan ki yung bru.
Kamtæ neiliang ka Dorbar Chnong Mookyrdup da dawa ko na ka JMB wa toh u sangeh noh syndon yei thmu yong ka.
