Ka Dorbar Chnong Moolamylliang, East Jaiñtia Hills da pynsñiaw ko yei pyrchah wa joor yei leh ka JHADC wa ki kattu katni ki bru kiwa da pyrchang yow tipmit ya ka Umpleng kam ka chnong thymme hanla kani dang em ko hapoh u pood u ang ka chnong Moolamylliang.
Neiliang u waheh chnong ka Moolamylliang, u Apmon Pachiang da ong u wa nadooh nachwa ya ka Residential Certificate, ka No Objection Certificate wa kiwi de ki kot ki sla wa emkaam u e cha ka sorkar kamjooh cha kiwi neibynta ki kaam wa boon jait ki wym toh ki yong ka sorkar da e bait da ka dorbar chnong neibynta i bha i miat ki paidbah kani ka thaaiñ.
Chooh chooh da ong wa ka Umpleng nadooh nachwa toh kawa em hapoh i pait ka Moolamylliang heiyatoh wa kiwon kiwon ki kaam lada yatoh wa u DC hadooh ki kaam pulit wei hadooh katni ym pu em ki bru wa chong chnong ha katai ka thaw lait noh ki kattu katni tylli ki dukan.
U waheh chnong da ong u leh wa ini i leh ka JHADC man i pyrchah ya ka aiñ ka Council hi heiwa ha ka kyndon 20 (i) ka aiñ Jaintia Hills Autonomous District Council (Establishment of Elaka, and village, appointment, powers, function and jurisdiction of Dolloi/Sirdar, Waheh Shnong) Act, 2015, da klam che ko wa yow ye u man kam ka chnong wa pura toh u em ym duna 20 tylli ki manyung wa 50 ngut ki bru waheh.
Da pyntip u leh wa ka dorbar chnong da dep ko wow ujor cha u Chief Executive Member ka Jaiñtia Hills Autonomous District Council, Jowai yow chimkhia ya ini i kaam wei wow leh katkam ki kyndon ka Council.
