Ka Meghalaya Peoples Committee on Aadhaar (MPCA) da pyrchah joor ko hajrong ka aiñ Election kawa thymme lane ka Election Laws Amendment 2021. Dang ini wa dep ka sorkar pyrdi da wanrah ko ya ka Election Laws Amendment 2021 heiwa ka yung dorbar chna aiñ ri, ka Lok Sabha waka Rajya Sabha da pdiang wei mynjur ki. Kani ka aiñ Election kawa thymme da chah ko wow pynyabi ya u Aadhaar Number wa i pyrtuid kiwa thap Vote lane ka Voter ID (EPIC) yong ki tre chnong ka ri India.
Ka MPCA da ong ko wa kani ka aiñ Election kawa thymme da booh ko ya kiwa thap Vote kiwa man ki tre chnong yong ka ri India hei maa wa khroo. Wei i leh yong ka sorkar pyrdi man ko i wym em yurim ha ka riti synchaar.
Da ong wa nadooh wa sdang hi ka MPCA da pyrchah joor ko yei pynkrehkaam ya ka Scheme Aadhaar wa ka Aadhaar Act 2016 hajrong ka yurim wa ka aiñ Aadhaar tooh wei pyndooh noh ko ya i hok tynre yong kiwa chong chnong wow im jar jiar yong samen lane ka Right to Privacy. Katni sa kani ka aiñ Election kawa thymme kawa chah wow pynyabi ya u Aadhaar Number wa i pyrtuid thap Vote daw tooh wei pyndooh noh leh yei hok yong ki tre chnong wow thap Vote.
Da pyntip leh wa dang ini wa dep ka jylla Telangana lyngba ka State Election Commission da pyrchang ki wow pynyabi ya u Aadhaar Number wa i pyrtuid kiwa thap Vote wei da chem wa kamwa 2.2 Million ngut ki pyrtuid kiwa thap Vote da wiar ki ngeiñ wei kawi na ki pyrtuid kawa paawnaam wa wiar toh i pyrtuid yong kawa yaleh Badminton kawa paawnaam ka Jwala Gutta.
U Justice Srikrishna, u khlieh dooh yong ka Data Protection Commission da ong u wa i pynyabi ya u Aadhaar Number wa i pyrtuid kiwa thap Vote man i iwa maa wei da booh hei maa ya ki tre chnong wa ha ri India ym pu em ya ka Data Protection Law namo ka aiñ wow yada yei tip chaphang ya idæ samen wa e i cha ki thaw krehkaam sorkar, ki Bank wa kiwi de.
I pynyabi ya u Aadhaar Number wa i pyrtuid kiwa thap Vote daw e laad ya ki bru kiwa wan chong wan sah wow man ki tre chnong næ ki Citizen. Ini daw booh yei eh hadien habood wa kha ma kha ki bru kiwa wan hi-eh wow chong chnong wow kylla tre ri tre chnong, najrong wa da em chwa sa ka Citizenship Amendment Act kawa da man chwa ka maa ya ka ri wa ka jylla.
Kamtæ neiliang ka MPCA da pyrchah joor wei kyntu ya kiwa chong chnong wow yaklam yatai bniah hajrong kani wei ka seiñ daw thooh ko ya ki luti wow yieñ pyrchah ya kani ka aiñ Election kawa thymme katkam ka riti synchaar.
Ka wyrta na u Kyrsoibor Pyrtuh, Meghalaya Peoples Committee on Aadhaar.
