Ka Dorbar Chnong Namdong-A lyngba ka khubor wa da phah da u Shiningstar Thubru, Secretary Chnong Namdong-A da pyntip u wa da phah ya ka ujor cha u Revenue Officer yong ka JHADC hajrong i wym leh iyi iyi leh u Copiusness Daw, Dolloi ka Elaka Nongjngi lyngba ka Village Court wow bichaar yei paan Land Holding Certificate (LHC) yong u Romario Sungoh kawa da man cha baar ka Pata kiwa da poi cha ki thaw yong ka chnong.
Ka chnong da pynsñiaw ko yei pyrchah joor yei leh u Dolloi wot hadien wa da dep booh ujor wym toh u tyrwa (Recommend) wow e ya ka LHC ya kani ka thaw tangwa ym em ap u ya ini i kaam wei ym em bichaar bniah u wei da lyngngoh leh wa u Dolloi uwa em hapoh ka District Council ym em burom u yeiwa phah ya oo da ka JHADC wow bichaar yow pyndooh yei kulmar ha ka imlang sahlang.
Ka JHADC da phah chithi ko cha u Chairman/Secretary Village Court, Elaka Nongjngi lyngba u Dolloi nadooh ka 19-08-21 yow pyndep bichaar ya kani ka kaam hapoh ka 15-09-21 tangwa hadooh katni u Dolloi wa ka Village Court ym em leh ki iyi iyi.
Ka chnong da pyrchah ko yeini yaleh ya kani ka LHC deiwa beiñ ya u Dolloi wa ym tip u iyi iyi ya ki thaw ki bhaw yong ka Elaka wa ki chnong ki thaw neibhah wa ki thaw yong ka chnong Namdong-A kiwa pyrtuid Khlieh Lamanang, Mynksing wa Thadthwai da pynkylla pyrtuid cha ka Myrlein wei kam kani ka thaw Myrlein ym em hapoh u pood u ang ka chnong Namdong wa Raij Namdong.
Kamtæ da ong wa ini i leh u Dolloi man ko pyrchah ya ka aiñ wei da dawa leh wow pynchitom ya uni u Dolloi hajrong kini ki kaam pyrchah aiñ.
