Pyrchah ka Raij Namdong wa Elaka Nongjngi yei kwah ka chnong Thadmynri wow psiah cha ka Elaka Nartiang

Ka Dorbar Raij Namdong deilang wa ka Elaka Nongjngi ynne i step da pynman ki ya ka yalang yow beiñ joor wei wow pyrchah yei phah pynman dorbar ka Administrative Officer (AO) ka JHADC ya uwa pait (Caretaker) ka chnong Thadmynri, u Well Bareh ha ka 25 tarik uni u bnai yow ap yei sur paidbah lada kwah sakhiat ki wow psiah cha ka Elaka Nartiang hadien wa ka JHADC da yoh ko ya ka chithi na u Caretaker hajrong ini wei kamjooh leh ka chithi wa da soi da kiwa chong chnong wa kwah ki wow psiah noh cha ka Elaka Nartiang.

Ka chnong Thadmynri toh ka wym em waheh chnong de nadooh u snem 2021 hadien wa kani ka kaam dapoi ko cha High Court neibhah ka Raij Namdong kamjooh ka Elaka Nongjngi da ong ki wa kani ka chnong dang em ko hapoh yong ki tangwa u waheh chnong warim da rah yabor u ya kani ka chnong chapoh ka Elaka Nartiang.

Da pyrchah leh wow pynman ya kani ka dorbar da u Caretaker neidaw wym pu ye u pynbait ya u pood ka Elaka Nartiang wa Elaka Nongjngi wei neiliang ka Raij Namdong kamjooh ka Elaka Nongjngi da ong ki wa toh u pynbait chwa ya u pood chwa wow pynman ya kani ka dorbar heiwa u Dolloi ka Nongjngi leh da pynche wa nadooh wa wan chong chnong kini ki bru ha Thadmynri toh deiwa tip u Dolloi ka Elaka Nongjngi tangwa katni won da ong ki wa kwah ki wow uiñ cha ka Elaka Nartiang lakam wa jooh em ki hapoh ka Elaka Nartiang.

Kamtæ da ong wa ini i phah pynman dorbar ka AO toh iwa leh kulmar wei neiliang ka Executive Committee yong ka Raij Namdong deilang ka dorbar chnong wa ki paidbah yieñ pyrchah ki yeini neibhah ka AO ym ap ko yei pynche yong ki kamjooh i paan pynche na ka neibhah wa kani ka chnong Thadmynri em ko hapoh ka Raij Namdong wa em hapoh ka Elaka Nongjngi nadooh nachwa hadooh katni.

Related posts

I sñiawngooh na ka manyung wa maad yei sñiawsih cha waroh kiwa da wan e yarap  

November 23, 2024

Jop suk ka NPP ya ka Gambegre Constituency deiwa yoh 42% ka Vote

November 23, 2024

Chooh chooh da ong leh wa ya u pood ym pu ye u pynbait da ki ar Dolloi hadooh katni wei da dawa wow pynpep chwa ya ini chwa wow rah ya ki chnong na kawi ka Elaka cha kawi yow lait u mih iwon iwon i yaleh hapyrdi ki mar jan chnong yow lait hi leh na iwon iwon i mynsoo mynsnaam.

Da e daw leh wa kattæ kiwa chong chnong da kulmar ki neidaw wa leh ka JHADC kawa khlem da bichaar hok, kamtæ da dawa wow pynsangeh yeini phah pynman dorbar ya u Caretaker ka Thadmynri wei lada mih i kulmar daw hap ka Council wow bahkhlieh.