Ka Raij Namdong kawa em hapoh ka Elaka Nongjngi da thoh ko cha ka Delimitation Committee ka JHADC hajrong i phiah khiar ya ki chnong wa em hapoh ka raij.
Da kdaw wa hapoh ka Raij Namdong da em 12 tylli ki chnong kitæ ka Namdong-A, Namdong-B, Mukhnang, Umjalasiaw, Madanrtiang, Lumrot, Thadmukoh, Ladmyngngor, Myngngor, Khonsaro, Kremmyrsiang wa Thadmynri wei kini ki chnong waroh toh kiwa em kattæ hapoh ka Mynsngat Khanduli Constituency.
Tangwa kamwa da tyrwa kattæ ya kini ki chnong da phiah ki lyngkhot lyngkhai heiwa chi lyngkhot da phah cha Umladang Modop Constituency, chi lyngkhot cha Mynsngat Khanduli Constituency wa chi lyngkhot cha Shilliang Myntang Constituency.
Hajrong ini da ong wa i rukom phiah ya ki chnong ka Raij Namdong ym myntoi ko ya kiwon kiwon tangwa iwa daw ktah pathan yei lai i wan wa i roi i paar neibhah wa jngai na kawi cha kawi ka chnong manda chah rah Constituency ki.
Da kylli leh wa ileh ki chnong yong kiwi ki Raij yoh ki wow emlang hapoh ka jooh ka Constituency katwa du ya ka Raij Namdong da tympiah hadooh kat deini.
Sa iwi i daw wa pyrchah toh lada leh kamwa da thmu, ki chnong ka Raij Namdong daw jngai ki da ki phaw Kilometer wei kammon u yoh myntoi manda hap u lai luti deiwa jngai neibhah ka Raij Namdong em ko u Waheh Raij wa kiwa kitkaam Raij wa pait ya ki thaw ki bhaw wa ki khloo ki kjam wa i chongsuk hapoh ka Raij.
Da ong leh wa u thap lang ya ki chnong wa jngai na kawi cha kawi ym yahaap wow em ki ha ka jooh ka Constituency iwa daw pyndooh yei sñiaw yajan sñiaw maya wei daw pyndooh ko yei chongsuk chongsaaiñ, kamtæ da dawa wow pynneh hi ya ki chnong kiwa yajan wow em ki ha ka jooh hi ka Constituency yow man ko i myntoi ya ki paidbah.
Da pynkut wa ym em pyrchah yei phiah Constituency tangwa ymtoh u leh deiwa thmu tympiah tympra ya ki chnong kiwa yajan.
Discussion about this post