Jowai: I pyrchah yaka Citizenship Amendment Bill (CAB) 2016 da poor ko cha War Jaiñtia heiwa ka seiñ kiwa kamai kari wa tip kam ka Chekri Diam Tourist Taxi waka Jaiñtia Students’ Union (JSU), War Circle hapoh ka lama ka CoHSO da pynman yalang ki ha Amlarem wow pyrchah ya kani ka Bill wei ya ka dak pyrchah da thang ya ka dur bula u Modi ha Iaw Dawki.
Ka Chekri Diam Tourist Taxi wa ka JSU ki pyrchah ki ya kani ka Citizenship Amendment Bill neidaw wa kani ka Bill wanrah ko yei chong buhai chnong ki baar ri ha jylla Meghalaya wa kiwi ki jylla ha thaaiñ mihsngi.
U Lastborn Tongper, President wa u Secretary u Lovely Swer ka Chekri Diam Tourist Association, da ong ki wa da ksoh kti ki wow pyrchah yaka CAB neidaw waka thaaiñ War daw chah ktah ko na i wan buhai chnong ki baar ri lada mynjur ya kani ka Bill.
Ha ka yalang kawa tbian wa pynlai da u President ka JSU (War Jaiñtia Circle) u Eddy Kerry Pohtam kawa pynman ha Iaw Dawki ha chwa wow thang ya ka dur bula u Modi, da yoh yei klam na u President ka JSU Shillong Circle u Treiborlang R Suchen uwa da pynsñiaw yei pyrchah ya ka CAB wei da dawa ya ka ILP kawa ye u pynman kyrpang ya ka thaaiñ Dawki neibhah man ko ka thaw kawa yajan waka ri Bangladesh wei da pynman khnang ya kani ka yalang wow wanrah ya ka khubor wei wow pynche ya u paaid ka ri wow man ki kam ki chipai yada ri yow lait na i psiah kulmar ki nong Bangla cha ka ri wa maya yong i.
Kam wow pynkynmoo wa ya ka CAB ynne ka sngi ym em mynjur ya ka haka Rajya Sabha wei daw wanrah biang u montri ka kaam pohyung ka ri u Rajnath Singh mynstep ya ka CAB hakhmat ka Rajya Sabha hapyrdi i pyrchah wa joor ym du naka thaaiñ mihsngi kamjooh ki lok ka sorkar NDA.
Discussion about this post