Ka Meghalaya & Greater Shillong Progressive Hawkers & Street Vendors Association (MGSPHSVA), kawa man ka seiñ kiwa chongdai madan da dap ko dei khyrngiat wow yoo ha ki laad pathai khubor ya ka hukum yong ki bor District ka East Khasi Hills wow khang yei dai tari ah kawi, tari ah jhoor wa kiwi kiwi da kiwa chongdai ha tymbud u sarok ka Khyndai Lad wa Jail Road.
Ka seiñ da ong ko wa kini ki tari toh kiwa da chna wei pynmih heini hi hapoh ka jylla da kiwa chong chnong kiwa da pliah ha ini i kaam wei hadien wa chna da chalan wow dai ya ki ha ki yaw ki haat, wei ini da man ko ka laad kamai ya kiwa boon.
“Waroh tip i wa kiwa uiñke suwari leh thied ki ya kini ki tari kam i dak sahkynmoo neibhah wa man ki kiwa kyrpang kiwa da pynmih na kani ka jylla,” da ong ka seiñ.
Kamtæ kani ka hukum da man ko wow khanglaad yei kamai ja kpoh yong kiwa chna, kiwa dai wa kiwa mylla kiwa kreh ha ki karkhana chna tari.
Ka seiñ kiwa dai madan ka sñiawthooh ko yei chong sier ha ka chnong ka thaw, tangwa ym ye won wow pdiang yeini i pyndooh ja. Ka seiñ ka smat ko wow ya krehlang wa ki bor District wow thooh ki laad ki luti wow yada yei kamai ja kpoh wei leh wow wanrah yei chong suk chong chngaaiñ.
Hajrong ini, da thoh leh cha ka DC ka East Khasi Hills yow pyrchah ya ka hukum.
Puræ leh: Da khang wow dai tari ha rood sarok ka Police Bazaar
