Pyrchah ka seiñ Pynroi-Pynbha Amlarem yei rah yaka Sub-Divisional Hospital cha Jaraiñ

Ka seiñ Pynroi-Pynbha Amlarem ha ka kyrwoh wa da phah, da pynsñiaw ko yei sñiawsih yei rai ka sorkar wow rah ya ka Sub-Divisional Hospital cha chnong Jaraiñ heithaw wow booh ka ha Amlarem kawa da man kam ka Headquarter nadooh u snem 1976 kawa da em lut leh ki yung krehkaam ki chnat sorkar waphær waphær wei da man ko leh ka chnong wa man hapyrdi neibynta ka yaaw ka haat waka khayi pateiñ.

Ka seiñ da ong ko leh wa ka Amlarem Sub-Division deilang waka Amlarem toh kawa da em hok wow em Sub-Divisional Hospital, wei toh leh u em ko ya u Sub-Divisional Medical & Health Office yow pynsuk leh ya ki PHC wa CHC wow yoh dawai ki.

Ka seiñ hapoh i yahkhmat u Babyson Pakyntein kam u Chairman da booddien ko ya ini i kaam wow booh Sub-Divisional Hospital ha Amlarem nadooh u snem 2018 deiwa lai e dorkhat, deiwa lai yachem wa ki heh sorkar nadooh u DMHO, DHS, Commissioner & Secretary ka Health & Family Welfare wa kamjooh ya u Montri ka chnat deilang wa ya u Montri ka thaaiñ wei da dap ki dei kmen hadien wa ka sorkar da mynjur ko wow booh ya kani ka Sub-Divisional Hospital heiwa da e sñiawbha leh yei thaw da kawi ka kur wei ya kani ka thaw da wan leh wow sorjamin (Survey) da ka Health Department heiwa da chem toh kawa bha wa biang.

Tangwa hadien ini da yoh yutip haka 13 tarik uni u bnai wa u MLA ka thaaiñ, u Lahkmen Rymbui da pynbna u wow booh noh ya katai ka Sub-Divisional Hospital ha chnong Jaraiñ iwa jngai hadooh 10 Km na Amlarem wei ini da leh deiwa pynku kyrdan donhi yaka PHC wa em ha Jaraiñ cha ka Sub-Divisional Hospital iwa ym ye u pdiang wei ym jooh em leh kamni.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ ka seiñ da dawa ko yei hok kam ki War Jaiñtia wei da pyrchah joor yei pynku kyrdan ya ka PHC cha ka Sub-Divisional Hospital ha Jaraiñ iwa man mar dei khangtleiñ iwa da tyrwa wei da mynjur da ki heh ka chnat i chait i khiah.

Ka seiñ da ong ko leh yaka PHC toh u pynku kyrdan cha ka CHC hadien won cha ka Civil Hospital wei i pynku yaka Jaraiñ PHC cha ka Sub-Divisional Hospital ym toh kawa em yurim wei ym jooh em sñiaw wa leh kamni wei da dawa yei pynche naka sorkar hajrong ini neibhah lada ong toh ka Sub-Divisional Hospital, toh u em ko leh haka Sub-Divisional Headquarter hi.

Da dawa leh wow pynsangeh ya ka pynbna sorkar namo ka Notification No. Health 149/2022/28 dt: 09-12-2022 kawa yatoh wow pynku kyrdan yaka Jaraiñ PHC cha ka Sub-Divisional Hospital.

Ka Wyrta na u Wanribhaki Tariang, Secretary Seng Pynroi Pynbha Amlarem.