Ka Thma U Rangli Juki (TUR) da pynsñiaw ko yei khyrngiat yei pynbna ka sorkar iwa man pyrchah paidbah hawa pynkrehkaam yaka Meghalaya Public Services Delivery Act 2020 kawa da pynkrehkaam lyngba ka Notification wa pynmih haka 14-02-21 heiwa hapoh ini i pynbna da khana katwon sngi chimpor wow pyndep u pynbiang yeiwa paan bor ki paidbah.
Ka TUR da ong ko wa da dep ko wow phah yei buit cha ka sorkar yow pynkhlan ya kani ka aiñ kamjooh da dawa leh wow em ka ya syllok waki paidbah neidaw wa kani ka aiñ man ko kawa tlot wei kawa da chna neibynta ki kor krehkaam ka sorkar ym toh neibynta ki paidbah wei da pynsakhiat ya ini hadien wa yoo ya kani ka Notification.
Kamtæ da kdaw wa hapoh i pynbna ka sorkar da chimpor hadooh 6 bnai wow yoh Card Rachon wei ini leh man ko i jooh i chimpor wow pynbait yei pyrtuid, i pyndam pyrtuid, u yoh da kawi ka Rachon Card kamjooh lada kwah wow kyrriah na kawi ka dukan cha kawi.
Katwa da chimpor du 15 sngi wow Register ya i kiad pharæng (IMFL Product), 7 sngi yow yoh yaka Import wa Export Permit yei kiad, 3 sngi yow yoh yaka Transit Permit neibynta i kiad, 7 sngi yow yoh yaka Temporary Bar License wa 30 sngi wow yoh yaka Bar License.
Lada em won kiwa kwah u lai riñ phlim (Movie Shooting) da chimpor 180 sngi yow yoh bor katwa yaka Mining License won ye u yoh ha ki 30 sngi.
Chooh chooh ka TUR da kdaw ko wa ka chnat Labour da pynbna wa chimpor 10 sngi yow Register wei wow e License yaki Contractor kamjooh kiwa kreh yong ki tangwa ym em won ong iyi iyi leh heiyatoh wow Register yaki Trade Union.
Ym em leh ong wa katwon u chimpor wow yoh kiwa lai puræ yaka Scholarship kamjooh leh ka tulop ki wakreh.
Na kini ki daw, ka TUR da ong ko waka sorkar kreh ko du neibynta kiwa em hei khih marpohkhyndaw, ki Contractor tangwa ya kiwi ki bru won pynchitom ko ki.
Ka TUR da kyntu ko yaki paidbah yow pynkitkhlieh ya kani ka sorkar deiwa dawa wa yaka Meghalaya Public Services Delivery Act 2020 toh u pynkylla deiwa yasalok chwa waki paidbah.
