Ka Thma U Rangli-Juki (TUR) da pynsñiaw ko yei pyrchah yeiwa ong u Montri ka chnat puræ puthi, u Rakkam A Sangma, heiwa da pynbna u wa skurbah namo ka State University wa nyngkong ka Meghalaya kawa tip kam ka Capt. Williamson Sangma State University daw wai ka deiwa lehniam pynkyntang deiwa ngooh Blai wei pynman yaseiñ Christan neidaw wa ka Meghalaya man ko kam ka Christian State.
Ka TUR da ong ko wa hanla ka Meghalaya toh kawa boon paaid ki Christan kiwa em boon jait tangwa ini ym mut wa man ko kam ka Christian State wei waroh ki yung krehkaam sorkar wa em ha India katkam ka Constitution ymtoh neibynta kiwon kiwon ki niam wei toh u pynjngai ki na waroh ki jait niam wei ini i u ong u Rakkam man ko pyrchah ya ki yurim ka Constitution ka ri.
Sa iwi leh da ong wa kani ka State University toh kawa da chna da ka poisa paidbah wei ymtoh u emyatoh ko wa kawon kawon ka niam wei kawa leh chiliang hawa e yei stat i nang neibynta waroh.
“Ka Meghalaya toh kawa manyung neibynta kiwa boon ki jait niam nadooh ki Songsarek, Niamtre wa Niam Khasi wei ini iwa klam u Rakkam Sangma pynyoo u yei biej wot hawa man u kam u Montri ka chnat puræ puthi neibhah da wanrah u yei sñiaw yaphær hapyrdi ki jait niam. Hao ka sorkar pyrdi kattæ hei yahkhmat u Narendra Modi da wai wot ya ka yung Parliament wa thymme deiwa lehniam Hindu tangwa ini ym mut wa i leh wow bood i kamjooh deiwa yakob lang wa ki hei chongchit niam,” da ong ka TUR.
Ka TUR da kwah ko leh wow pynkynmoo ya u Rakkam Sangma wa oo da chim smai u wow yada ya ka Constitution ka ri wei i klam chongchit man ko pyrchah yeiwa da chim smai u.
Kamtæ hajrong ini, da ong wa toh u pyndam yei thmu wow pynman yaseiñ wei u Montri leh toh u pyndam noh u yeini wa da ong u.
Ka TUR da khut ko leh ya ki paidbah kamjooh ki seiñ saiñpyrthai wow beiñ yeini wa ong u Rakkam iwa klam chongchit u wei wow ya krehlang yow yada ya ki yurim wa da booh ha ka riti synchaar ka ri.
Puræ leh: Yoh ka Captain Williamson Sangma State University yei tipmit na ka UGC
Discussion about this post