Neiliang yong ka Wahiajer Narpuh Social & Sport Club deilang wa kiwa chong chnong ka Wahiajer Narpuh da pyrchah joor ki ya ka Public Hearing wa daw pynman wa da e NOC da u Waheh Chnong ka Wahiajer Narpuh khlem da pynman ya ka dorbar hapoh ka chnong.
Da khut kyrpaad leh ya ki seiñbhalang, ki para chnong, para jan chnong wa ya kiwon kiwon ki wym sñiaw yahaap ya kani ka Public Hearing kawa daw pynman da ka M/s Meghalaya Cement LTD haka 24-08-23 neibynta wow pynheh ya kani ka karkhana wa i bor pynmih Clinker naka 2600 TPD (0.858) cha ka 4500 TPD (1.485) deilang waka 10 MW Captive Power Plant waka 9.5 MW Waste Heat Recovery Systems (WHRS).
I daw wa pyrchah ya kani ka Public Hearing toh neidaw wa da jan palat cha ka chnong iwa ym em de tang kamwa 500 Meter leh.
Sa kiwi leh ki daw toh i chah ktah ya kiwa chong chnong wa kiwi kiwi leh kiwa em ha kani ka thaaiñ neibhah kam kiwa chong chnong da maad ki chiboon i eh nadooh wa wan kini ki Cement Factory nadooh ka umbaam umdih leh ym man de wow dih kamjooh ka la-ær leh kawa da sih deiwa em kini ki karkhana hadooh wym hoi de tang u riñ mynsien leh iwa da ktah bha ya ki khynnah wa ki khonboo.
Da ong leh wa da mih boon ki jait kjut nadooh wa mih kini ki karkhana kam ka Chronic Bronchitis, Asthma, Emphysema, Lung Cancer, Pneumonia, Tuberculosis, i chitom u riñ mynsien, i kyoh, ka hiaw, i khai riñ, i kjut rupai, i wym biang de i rukom tied u klongsnaam, i ad ki kjat, i ku ka BP, i booid ki khmat, i mih boon jait ha ka sniehdoh, i pisa mynsien, i tlot bor wa kiwi kiwi de.
Da kdaw leh yei chah ktah ka rep ka riang nadooh wa wan kini ki karkhana heiwa ki khyndaw leh da sih lut ki na ki pum-pum wa mih na ki karkhana, ki soh wa da jooh mih leh ym em de mih ki katni wei da dooh lut waroh plak.
Na kini ki daw da pyntip cha waroh ki wym sñiaw yahaap ya kani ka Public Hearing wow ya wan kyrchaan lang ki yow pynyoo yei pyrchah ha katai ka sngi.
Discussion about this post