Ka WJNC, kawi na ki seiñbhalang na Ri-loom Jaiñtia da pyrchah joor ko ya i rai yong u Deputy Commissioner ka West Jaiñtia Hills District hajrong i e hukum yong oo wow phah chim tika yada COVID-19 ya ki paidbah khlem i pynche.
Ka seiñ da ong ko wa hei yongsakhiat ki paidbah em ki i hok wow jied ya kawon ka luti neibhah kam ki bru em ki ka hok wow kyntait lane jied wow chim tika ya i doh i pran yong ki. Da ong leh wa katkam ka hukum ka Supreme Court da khana che ko wa i hok manbru em i ka hok heiyatoh wa i doh i pran yong i.
Neiliang yong u President, u Secretary wa u Education Secretary yong ka seiñ da beiñ joor ki ya ini i leh embor yong u Deputy Commissioner wow phah lai chim tika ya ki paidbah.
Kamtæ ka seiñ da ong ko wa ini toh i pyntieñ, pynsier ya kiwa boon walang neibhah katkam ka khubor wa yoo i uni u DC da khana che u wa kiwon kiwon ki wym phah e tika COVID-19 ym yoh de ki u lai khih laikreh kamwa jooh.
Heiyatoh wa kani ka khubor, neiliang ka seiñ daw lai yachem ko wa u DC wei lada ki bor sorkar pynbor ki ya ki paidbah wow chim tika COVID-19, ka seiñ daw thooh ko da kiwi won ki luti wow pyrchah ya ini i leh embor ka sorkar.
