Ynne ka sngi da ki spah ngut na Umpher 12 Mer, Amphanggre wa Matchokkgre chirup wa ka JAC Ri Bhoi District, da pynman ki da ka Rally wow pyrchah yei thmu ka sorkar wow pynkylla ya ka Conservation Training Institute (CTI) ka Soil and Water Conservation Department kam ka Industrial Estate.
Kani ka Rally namo i lai kjat paidbah da sdang na chnong Umpher wei da pynkut ha Office ka CTI.
Ha ka Rally, kiwa yahkhmat da ong ki wa i rai ka sorkar toh iwa khlem da pdiang næ tip ki paidbah.
Ya kani ka Rally da kyrchaan da ka KSU, FKJGP, RBYF, Byrnihat Citizens Forum, Garo Students Union (Ri-Bhoi Regional Unit), Byrnihat Women’s Society wa ki khynnah ka St. Jude Secondary School.
Ha kani ka lai paidbah da rah leh ya ki Placard wow beiñ ya ka sorkar hajrong i thmu wow pynkylla ya ka CTI kam ka Industrial Area hapoh ka Invest Meghalaya Authority.
Chooh chooh da pynsñiaw leh yei khia mynsien neibhah ka thaaiñ daw man ko kawa sih ka la’ær ka um deiwa kdaw wa ka Byrnihat man ko kawa tngit dooh ha India.
Da kdaw leh wa i pynkylla ya ka CTI kam ka thaw booh karkhana daw ktah i ya ki palat 3,000 ngut kiwa chong chnong kiwa chaniah na ki khloo ya ka um dih wa i yada ya ka ramaw.
Hadien i lai paidbah da em ka yalang ka JAC wa kiwi ki seiñ heiwa da beiñ ya u Chief Minister wei da rai leh wow yachem ya oo wei wow e kti ya ka dorkhat hajrong ini waroh.
Discussion about this post