Ki paidbah u Ynñiaw Trep wa sah ha Barak Valley Assam da pynsñiaw ki yei pyrchah wow chna ya ka Barak Wildlife Sanctuary ha ka yalang Annual General Conference wa da pynman ha ka 8 tarik uni u bnai ha Khasiya Punjee, Krishnapur kawa em ha Barak Valley, Assam.
I daw wa pyrchah toh wa lada em kani ka Wildlife Sanctuary daw ktah i yei khih i khan ki Khynriam, ki Pnar, ki War wa sah ha kini ki thaw wei daw chah beh ki leh na ki thaw sah ki wei da maham leh wa lada ka sorkar lai ko chakhmat daw pynman ya ki yakhih wa heh.
Ha kani ka yalang wa da pynman chisien chi snem kawa tip kam ka Annual General Conference wa da pynman da ka KSU Barak Valley Circle da wan wow sakhi da kiwa boon heiwa ha uni u snem da wan u Paul Lyngdoh, MDC KHADC kam u kongsan.
I pyrchah leh man ko ha ki ar bynta kitæ toh wow booh ya ar tylli ki Wildlife Sanctuary kitæ ka Barak Bhubon Sanctuary waka Borail Wildlife Sanctuary neibhah lada pynbna ya kini daw ktah ko ym du ya ki paaid ka Ynñiaw Trep Ynñiaw Wasa wot kiwi de ki jaitbru kiwa em 18 jait wa em ha kani ka thaaiñ kiwa da chong da sah ha kini ki thaw nadooh ki por ki syiem warim.
Lada lai chakhmat ka sorkar wow leh yeini daw haap ki 150 tylli ki chnong hapoh kini ki Wildlife Sanctuary wei daw chah ktah 1.50 lak ngut ki bru kiwa daw dooh leh ya ki thaw rep wa ki laad im-ja ki.
