Ynne ka sngi da pynman ya ka pynsñiaw paidbah namo ka Public Hearing heiyatoh wa ka thaw noh jhep ka Jowai Municipal Board (JMB) namo ka Sanitary Landfill ha Moochutsdai, Thadmusem, West Jaiñtia Hills heiwa ya kani ka pynsñiaw paidbah da pynlai da u DC ka District, u Garod LSN Dykes.
Kiwa wan chimbynta ha kani ka sngi toh ki paidbah na ki chnong kiwa kynthup ya ka Nongkhroh, Thadmusem, Larnai, Sohphoh wa kiwi kiwi na ka thaaiñ.
Chwa wow sdang ya kani ka pynsñiaw paidbah da em i batai hajrong kani ka Sanitary Landfill heiwa da khana yei thmu ka sorkar heiwa da batai kammon wow yoh myntoi na kani ka thaw wei kammon u krehkaam ko.
Neiliang ki paidbah kiwa da wan, da pynsñiaw ki yei pyrchah wa joor yong ki deiwa ong ki wa i daw wa pyrchah ki ya ini i thmu toh neidaw wa em ki hali wa cha tre yong kani ka thaw wei i em kani ka thaw noh jhep daw ktah i ya kini ki hali.
Da ong ki leh wa i em kani ka thaw daw wanrah i ya i sma i tung iwa daw ktah ya i chait i khiah ki bru wa kiwa chong chnong ka thaaiñ.
Da kyntu leh ya ka sorkar wow sangeh u wan noh jhep ha ini i thaw chisien don neibhah ini i leh ka Jowai Municipal Board man i pyrchah ya i sñiaw ki paidbah wa boon walang.
Heijooh i por da ong ki leh wa lada pdiang ki wow wan noh jhep ha ini i thaw, ka pateiñ ka mynried mankawi wow chah ktah ka wow tim kylla pathan ya ki.
Kamtæ da raikut ki paidbah wa boon ynne ka sngi ha ka Public Hearing wow pyrchah ya ini i thmu ka sorkar wow chna ya ka Sanitary Landfill namo ka thaw noh jhep ha ini i thaw.
