Shillong: Kiwa chong chnong ka thaaiñ Umtyrnga wa ki chnong wayajan da dawa ki na ka sorkar wa ki bor District kamjooh na ka Khasi Hills Autonomous District Council wow pyndam noh ya i pypsiah pyrtuid (Register), u Deilangchirup Law ya i thaw wa em 12,000 Acre wow dai cha ki chipai BSF.
Hawa klam ynne ka sngi wa kiwa pathai khubor ha Shillong, u heh chnong ka Umtyrnga, u Marcus Lapasam da ong u wa kaktkam ka RTI da chem yei pynpsiah pyrtuid ya ki thaw nadooh u snem 2016 iwa pynyoo wa i leh man i iwa pyrchah aiñ.
Da ong u wa lada ym pyndam ya i pynpsiah pyrtuid u Deilangchirup Law neiliang kiwa chong chnong ym yohsa ki wow chim ya ka aiñ ha kti yong ki hi.
U Marcus Lapasam da ong u ya i thaw da thmu wow dai cha ki BSF heidor T.65,000 chi acre wei lada kheiñ plak, da thmu wow dai yei thaw hei dor T.78 Klur.
Da ong wa u Law da khyrrup lut u ya ki thaw yong palat 12 tylli ki chnong deiwa pynpsiah tooh ya kitai ki thaw wa kynjoh hadooh 12,000 Acre heiwa ya u pood u ang wa da thaw ymem wa tip.
Chooh chooh da ong u wa i thaw wa thmu wow dai cha ki BSF man i 7413 Acre iwa ktah ya boon tylli ki chnong, tangwa ha ka ka map da pynyoo wa ktah ko du ya ki 3 tylli ki chnong wa kynthup ya ka Nagrabil, Pilingku A wa Pilingku B.
U Lapasam da ong u wa hadien wa da chem yeini, neiliang kiwa pynlai chnong ka thaaiñ da ujor ki cha ka Hima Mylliem ha ka 3 Khonchonglad (Nov) 2018 wa cha u Deputy Commissioner ha Ri-Bhoi District kamjooh ha u MLA ka thaaiñ. Hadien ini ha ka 22 Khonchonglad 2018, u Acting Syiem ka Hima Mylliem da khut u ya ka dorbar heiwa da emlang leh u Deilangchrup Law, wei waroh ki paidbah da pyrchah ki yeini i leh yong oo, tangwa iwa phylla won toh uwi na ki montri ka Hima da ong u wa ym em hok ki Khasi wow kamtre ya katai ka thaw lait na ki Marwet.
U Lapasam da pyntip u leh wa uwi u Agent uwa tip pyrtuid kam Monu Areng da kam u ha ki Social Media wa ya katai ka thaw da e sñiawbha da ki 3 chnong neibhah wa toh ka thaw wym em tre wei ym ktah ko ya ki thaw rep.
Da pyntip u leh wa kiwa dai ya ini i thaw toh u Munu Areng na Nagrabil, u Thomas Marai na Umsem, u Padius Sangma na Pilingku A, u Parak Sangma na Pilingku B, u Anthony Kharthangmaw na Umlathu, Rejied Teron na Pilingku A, u Ken Syiem ka Raid Marwet wa ka Hima Mylliem.
Katkam wa ong u Lapasam ki chnong kiwa chah ktah lada e thaw ya ki BSF kynthup ki ya ka chnong Umtyrnga, Umlathu, Umsem, Nagrabil, Pilangku A, Pilangku B, Chibra, Jolsyiem, Jyrmang, Gambalbari A, Gambalbari B, Bahenanodi, Timbogre, Nongspung B, Nongspung A, Pyngker A, Pyngker B, Pyngker C, Pahamjula, Lalmati, Nongspung C,Barapathar wa ka chnong Iongkhuli.
Discussion about this post