Ki seiñbhalang kiwa na Ri-loom Garo wa kynthup ya ka GSU, AYWO, FKJGP, ADE waka FAF da pynsñiaw ki yei artatien ya iwa da tyrwa wow pynkylla ya ka Sixth Schedule deiwa ong wa da em i pyrchang du wow leh ya ka “Vote Bank Politics” yow yoh ya i Vote kiwa bood ya ka niam Hindu wa em ha Ri-loomGaro kam ki jaitbru Koch, Boro, A’jong wa Rabha. Deiwa ong wa ini i pyrchang toh iwa daw wanrah yei sñiaw yaphær jaitbru wei daw wanrah leh yei yei awri awra hapyrdi ki jaitbru ri-loom.
Da ong wa ini i pyrchang wow mang ya ki jiatbru ri-loom kiwa man kam ki Hindu daw ktah bha ko ya ka Ri-loom Garo neibhah daw ktah ko yei chongsuk wa da em chwa katni deiwa wanrah ya i kylla khlem da sñiawthooh yei long i man iwa nadooh warim hapyrdi ki Koch, Boro, Garo,A’jong, Man wa kiwi.
Hajrong ini waroh da kdaw yei pyrchang ka sorkar India wow wanrah ya i kyntien “Unrepresented Tribes” namo kitu ki jaitbru ri-loom ki wym yoh ya kiwa mihkhmat ha ini i pynkylla iwa tip kam ka “The Constitution (One Hundred and Twenty-Fifth Amendment) Bill, 2019” yow pynkylla ya ka 6th Schedule. Da kdaw leh wa ha ka Section 3, (a) ka paragraph 2, (i) ha sub-paragraph (1) daw thap ya ki kyntien wa ong wa u Lat daw tyrwa (Nominate) u yei pyrtuid ki 6 ngut heiwa 2 ngut toh u man ki ki kynthai wei ym duna ya 4 ngut ki wow man kam kiwa mihkhmat ki bru ki wym em yoh yei mihkhmat (Unrepresented Tribes). Kamtæ da ong wa da dep wow yaklam wei wow pyrchah ya ini neibhah wa ym em aiñ wow khang ya ki Koch, Hajong wa Rabha wow chibynta ha ki Election ka GHADC wei kattu daw em ki i jooh i hok hapoh ka 6th Schedule.
Da kdaw leh wa ha kawon kawon ka Election ka GHADC da em bait 2 ngut ki kyrtong kiwa naka jaitbru Koch, Rabha, A’jong kiwa jop wei lada thung (Nominate) ya 4 ngut na kini ki jaitbru daw em noh ki waroh 6 ngut hapoh ka GHADC iwa ym sñiaw yahaap wei ym toh iwa miat. Kamtæ da ong wa lada kwah ki wow man kam kitæ ki Unrepresented Tribe ym toh u yaleh Election ki hapoh ka GHADC. Deiwa ong leh wa kammon u yoh ki ya ki MDC kiwa jied ha ka Election heijooh i por u man ki kam kitæ ki wym yoh ya kiwa mihkhmat hapoh GHADC kamjooh hapoh ka Assembly.
Kamtæ da kyrpaad ya u Montri Rangbah ka Meghalaya wa u CEM ka GHADC wow pyrchah ki ya ini i thap ya ini i kyntien “Unrepresented Tribes” hapoh ka 6th Schedule Amendment.
