Ki seiñbhalang wa em hapoh ka jylla Meghalaya da pynsñiaw ki yei pyrchah yei chim rai ka sorkar jylla wow chah u wanrah yaki baar jylla daki Contractor, ki Company ki wow kreh yaki kaam waphær waphær hapoh ka jylla.
Neiliang ka HYC da pynkynmoo ko yaka sorkar wa hadooh kattæ dang joor i ku kiwa yoh COVID-19 hapoh ka ri khamtam haka jylla Assam, West Bengal wa kiwi kiwi, kamtæ kammon u tip yi wow wanrah ya uni u khñiang chapoh ka jylla iwa daw booh yei maa yaki tre jylla. Wei sa iwi leh boon kiwa yoh ya uni u khñiang tangwa ym em ki yei dak i chin wa chitom ki.
Neiliang ka Federation of Khasi Jaintia & Garo People (FKJGP) Central Body da pyrchah joor ko leh ya ini i thmu ka sorkar jylla ha kam kini ki por wa ki paidbah dang sñiaw syier wei kulmar pyrkhat katwa dang mih ki sngi neidaw wa kiwa yoh COVID-19 nang joor ki khamtam ha ka jylla Assam kawa em ha rood ka jylla Meghalaya.
Ka seiñ da ong ko leh wa du i lai hapyrdi kawi ka District wa kawi ka District ka jylla leh ym chah, kammon won u chah sa kiwa na baar ka jylla.
Neiliang ka Khasi Students’ Union Central Executive Council da pynsñiaw ko leh yei pyrchah deiwa ong leh wa lada kiwa wan mylla chapoh ka jylla hap ki wow chong Quarantine 14 hadooh 18 sngi, kiyi wow pynbiang thaw yaki wei ka sorkar hap klam che ko kiyi wow hap pynlut ya ini.
Ka seiñ da kyntu ko leh yaka sorkar wow khang chwa yaka lai na kawi ka jylla cha kawi neidaw wa kiwa yoh COVID-19 ha Assam dang ku ki wei ini ym toh i por wow leh chngaaiñ.
Ka seiñ da khut ko ya waroh ki para ri wow ya ksohkti lang wow chim lang ya i kitkhlieh dei wym yah yaki wakreh na baar jylla yow lait na i kynrum kynram.
Discussion about this post